O‘zbekiston va Rossiya o‘rtasidagi migratsiya jarayonlarida yangi imkoniyatlar yaratilmoqda. Bu haqida Zamin.uz xabar berdi.
Tashqi ishlar vazirligi matbuot kotibi Ahror Burxonovning ma’lumotiga ko‘ra, yaqin kelajakda ikki davlat fuqarolari bir-birining hududiga faqat ichki pasport yordamida kirishlari mumkin bo‘ladi. Hozirda mazkur masala bo‘yicha muzokaralar davom etmoqda va ichki tartib-taomillarni ishlab chiqish ishlari olib borilmoqda.
Shu sababli aniq muddatlar haqida hozircha gapirish erta ekanligi ta’kidlandi. 2025 yil may oyida O‘zbekiston hukumati Rossiya, Qozog‘iston va Ozarbayjon fuqarolarining mamlakatga 30 kungacha ichki pasport yoki ID-karta bilan kirishiga ruxsat berish masalasini ko‘rib chiqdi.
Bolalar esa maxsus “Kinder passport” asosida tashrif buyurishi mumkinligi belgilangan. Ushbu tashabbus Prezident Shavkat Mirziyoyevning 15 maydagi farmonida o‘z ifodasini topgan bo‘lib, mamlakatga sayyohlar oqimini oshirishga qaratilgan.
Hozirgi vaqtda O‘zbekiston va Rossiya o‘rtasida vizasiz tartib amal qiladi, biroq Rossiya fuqarolari O‘zbekistonga kirishda xorijiy pasportni taqdim etishlari shart. Shuningdek, ular 15 kundan ortiq muddat qolganda, vaqtinchalik ro‘yxatdan o‘tish majburiyatiga ega.
O‘zbekiston fuqarolari esa Rossiyaga kirishda “qizil” pasportdan foydalanmoqda va kirishdan keyin 7 ish kuni ichida Rossiya Ichki ishlar vazirligining hududiy migratsiya bo‘limlarida ro‘yxatdan o‘tishlari talab etiladi. Bundan tashqari, 2025 yil 30 iyundan boshlab Rossiyaga vizasiz kelayotgan barcha xorijiy fuqarolar “Gosuslugi RuID” mobil ilovasi orqali oldindan ro‘yxatdan o‘tib, QR-kod olishlari majburiy bo‘ladi.
Ushbu yangiliklar ikki davlat o‘rtasidagi migratsiya jarayonlarini yanada soddalashtirishga qaratilgan. Manba: Izvestiya.
