Qozog‘istonning Olmaota viloyati Iliy tumanida metall qabul qilish shoxobchasida 11 sentyabr kuni kuchli portlash yuz berdi. Bu haqida Zamin.uz xabar berdi.
Ushbu hodisa natijasida uch nafar O‘zbekiston fuqarosi halok bo‘ldi. Bu haqda hudud politsiya boshqarmasi ma’lumotlariga tayangan holda “Zakon.kz” xabar berdi.
Rasmiy ma’lumotlarga ko‘ra, portlash noma’lum zararli moddalar ta’siri ostida sodir bo‘lgan. Hodisa joyida politsiya, yong‘in xavfsizligi xodimlari va tez tibbiy yordam brigadalari faoliyat yuritdi, ammo qurbonlarning hayotini saqlab qolish imkoni bo‘lmadi.
Shoxobcha egasi Amirbek Sherbayevning so‘zlariga ko‘ra, metall orasida harbiy chiqindilar ham bo‘lgan bo‘lishi mumkin. U portlamagan mina mavjudligi ehtimolini bildirdi.
Sherbayevning aytishicha, yaqin atrofdagi sexni xitoyliklar ijaraga olgan va ular metallolomni arzon narxda sotib olgan, ammo uning ichida nima borligini aniq bilmagan. Hozirda barcha kuch tuzilmalari kelib, hodisani chuqur o‘rganmoqda.
“Nur.kz”ning ma’lumotlariga ko‘ra, portlash joyi to‘liq o‘rab olingan va hech kim kiritilmayapti. Kriminalistlar hamda Mudofaa vazirligi vakillari tergov ishlarini olib bormoqda.
Portlash sabablari hozircha aniqlanmoqda. Ushbu fojia nafaqat mahalliy aholida, balki keng jamoatchilikda ham chuqur iztirob uyg‘otdi.
Uch nafar ishchining bevaqt halok bo‘lishi xavfsizlik qoidalariga jiddiy e’tibor qaratish zarurligini yana bir bor ko‘rsatdi. Manba: Zakon.kz
