Mirziyoyev fidokor o‘qituvchini avtomobil bilan taqdirladi
O‘zbekiston Prezidenti Shavkat Mirziyoyev O‘qituvchi va murabbiylar kuni arafasida bilim va ma’rifat sohasida fidoyilik bilan xizmat qilayotgan ustozlarni alohida e’tirof etdi. Bu haqda Zamin.uz xabar berdi.
Buxoro viloyatining Romitan tumanidagi 38-maktabda ingliz tili fanidan dars beruvchi Billura Ikromova davlat rahbari tomonidan maxsus sovg‘a bilan taqdirlandi. Billura Ikromova nafaqat o‘z bilim va tajribasi bilan mahalliy o‘quvchilarga, balki qishloq qizlariga ham namuna bo‘lib kelmoqda.
U Buyuk Britaniyaning nufuzli Reding universitetida ta’lim olgan va TESOL, ESOL hamda IELTS (C1) kabi xalqaro sertifikatlarga ega. Katta idoralar va xalqaro tashkilotlardan kelgan yuqori maoshli ish takliflarini rad etib, u o‘z yurtini va chekka qishloqdagi yoshlarni tarbiyalashni afzal ko‘rdi.
Billura Ikromova tashabbusi bilan qishloq qizlari uchun mentorlik dasturlari yo‘lga qo‘yildi va bu orqali ko‘plab yoshlar xorijiy grantlar hamda ta’lim dasturlariga jalb etilmoqda. Fidokorona mehnati uchun Prezident Shavkat Mirziyoyev unga BYD Chazor avtomobilini sovg‘a qildi.
Bu voqea nafaqat o‘qituvchi uchun, balki butun jamoa uchun katta ilhom manbai bo‘ldi (manba: zamin.uz).
