Rossiyalik sayyohlar yangi yilni noodatiy va esda qolarli tarzda o‘tkazish istagini kuchaytirmoqda. Bu haqda Zamin.uz xabar berdi.
Shu sababli, O‘zbekiston hozirda ularga eng ommabop yo‘nalishlardan biri sifatida tanilmoqda. Rossiya turoperatorlari assotsiatsiyasi ATOR ma’lumotlariga ko‘ra, O‘zbekiston yangi yilni nishonlash uchun rossiyalik sayyohlar orasida eng yaxshi beshta yo‘nalish ro‘yxatiga kirdi.
Ushbu ro‘yxatda Sankt-Peterburg, Kaliningrad, Kareliya va Velikiy Ustyug kabi shaharlar ham mavjud. Mutaxassislar ta’kidlashicha, rossiyaliklar qishning sovuqligidan qochib, iliq iqlim, boy tarixiy va madaniy muhitni tanlashni ma’qul ko‘rmoqda.
O‘zbekistonda yangi yil bayramini o‘tkazish nafaqat quvnoq, balki madaniy sayohat sifatida ham qiziqarli bo‘lishi mumkin. Bu mamlakat sirli sharq havosi, Buyuk Ipak yo‘lining tarixiy shaharlari va boy ekskursiya dasturlari bilan ajralib turadi.
ATOR ma’lumotlariga ko‘ra, ayniqsa 50 yoshdan oshgan, ammo yoshlik ruhini saqlab qolgan sayyohlar, blogerlar va tarixga qiziqqanlar uchun O‘zbekiston yo‘nalishi ayni muddao hisoblanadi. Sayyohlar Samarqanddagi yangi yil yulduzlari ostida bayram qilishlari, Temuriylar davriga oid tarixiy yodgorliklarni ko‘rishlari yoki mamlakatning boshqa durdona shaharlari bilan tanishishlari mumkin.
Mahalliy turoperatorlar turli yangi yil dasturlarini taklif qilmoqda. Masalan, “Samarqand osmonida yangi yil yulduzlari”, “Temuriylar xazinalari bilan yangi yil” va “O‘zbekiston durdonalari orasida yangi yil” kabi turlar katta qiziqish uyg‘otmoqda.
ATOR sayyohlarga yangi yil kunlari uchun chiptalarni oldindan bron qilishni tavsiya qilmoqda, chunki bu davrda yo‘nalishlarga talab juda yuqori bo‘ladi (manba: zamin.uz).
