Ona sutini almashtiruvchi reklamalar cheklanadi
O‘zbekistonda ona sutini almashtiruvchi mahsulotlarning reklamasi cheklanishi va bolalar oziq-ovqatlarini ishlab chiqarish, import qilish, saqlash hamda sotish tartib-taomillarini kuchaytirish taklif qilinmoqda. Bu haqda Zamin.uz xabar berdi.
Ushbu taklif Prezident Shavkat Mirziyoyev ishtirokida o‘tkazilgan taqdimotda ilgari surildi. Bu choralar emizishga asoslangan oziqlantirishni rivojlantirish bo‘yicha milliy dastur doirasida amalga oshiriladi.
Dastur maqsadi 2030 yilga qadar 6 oygacha bo‘lgan chaqaloqlarni faqat ona suti bilan oziqlantirish darajasini 70 foizga yetkazishdir. Bu ko‘rsatkich Jahon sog‘liqni saqlash tashkilotining tavsiyalariga mos keladi.
Milliy dastur doirasida JSST va UNICEF tashabbuslari – “Bolangiz uchun do‘stona shifoxona” hamda “Emizishda o‘n qadam” loyihalari amalga oshiriladi. Shifokorlar ona suti bilan oziqlantirish bo‘yicha maslahat berishga o‘rgatiladi, shuningdek, homilador va emizikli ayollar uchun maxsus o‘quv mashg‘ulotlari tashkil etiladi.
Ushbu chora-tadbirlar bolalar sog‘ligini mustahkamlash va ona suti bilan to‘liq oziqlantirishni rag‘batlantirishga qaratilgan. Manba: kursiv.media.
