O‘zbekiston Prezidenti Shavkat Mirziyoyev 20-sentyabr kuni Nyu-York shahriga yetib bordi. Bu haqda Zamin.uz xabar berdi.
U Birlashgan Millatlar Tashkiloti Bosh Assambleyasining 80-yubiley sessiyasida ishtirok etadi. Prezidentni Jon Kennedi xalqaro aeroportida AQSH rahbarining global sherikliklar bo‘yicha maxsus vakili Paolo Zampolli, Amerika – O‘zbekiston savdo palatasi raisi Kerolin Lemm hamda boshqa nufuzli shaxslar tantanali kutib oldi.
Tashrif davomida Shavkat Mirziyoyev BMT Bosh Assambleyasining umumiy munozaralari minbaridan nutq so‘zlaydi. Unda O‘zbekistonning xalqaro siyosatdagi o‘rni, shuningdek, dolzarb global masalalar bo‘yicha taklif va tashabbuslari haqida so‘z yuritishi kutilmoqda.
Shu bilan birga, Prezident bir qator xorijiy davlatlar rahbarlari, xalqaro tashkilotlar va yirik moliyaviy tuzilmalar yetakchilari bilan uchrashuvlar o‘tkazadi. Muzokaralarda siyosiy aloqalarni mustahkamlash, savdo-iqtisodiy hamkorlikni kengaytirish va investitsiyaviy loyihalarni amalga oshirish masalalari muhokama qilinadi.
Bundan tashqari, AQSHning yetakchi korporatsiyalari va kompaniyalari rahbarlari bilan alohida muloqotlar, davra suhbatlari ham rejalashtirilgan. Uchrashuvlarda O‘zbekistonda olib borilayotgan iqtisodiy islohotlar, xorijiy investorlar uchun yaratilayotgan qulay sharoitlar va yangi qo‘shma loyihalar muhokama qilinadi.
Prezidentning Nyu-York safari xalqaro hamkorlikni yanada rivojlantirish va mamlakat manfaatlarini global maydonda kengroq targ‘ib qilishda muhim qadam sifatida baholanmoqda. Manba: zamin.uz
