Oktyabr boshida O‘zbekistonda yomg‘ir va sovuq ob-havo
O‘zbekiston gidrometeorologiya markazining ma’lumotlariga ko‘ra, sentyabr oyining oxirgi kunlarida mamlakatimizda asosan quruq va iliq ob-havo kuzatiladi. Bu haqda Zamin.uz xabar berdi.
Kunduzgi harorat +26 dan +29 daraja atrofida bo‘lib, ayrim hududlarda +31 darajagacha yetadi. Biroq oktyabr oyining birinchi kunlaridan ob-havo keskin o‘zgaradi.
Qozog‘istondan kirib kelayotgan salqin va nam havo oqimi tufayli respublika bo‘ylab yomg‘ir yog‘ishi kutilmoqda. 1 oktyabrda Qoraqalpog‘iston, Navoiy va Toshkent viloyatining shimoliy hududlarida yomg‘ir yog‘ishi mumkin.
2 oktyabrda esa Farg‘ona vodiysi viloyatlari, Toshkent, Samarqand, Jizzax va Sirdaryo hududlarida kechasi va ertalab yomg‘ir yog‘ish ehtimoli bor. 3 oktyabrda faqat Farg‘ona vodiysida qisman yog‘ingarchilik davom etadi.
Harorat 1 va 2 oktyabr kunlari keskin pasayib, kechasi va ertalab +8 dan +13 darajagacha, kunduzi esa +18 dan +23 darajagacha bo‘ladi. Respublikaning shimoliy hududlarida harorat yanada past bo‘lib, kechalari +4…+9, kunduzlari esa +15…+18 darajani tashkil etadi.
3 oktyabrdan boshlab kunduzgi harorat 2-3 daraja ko‘tarilishi kutilmoqda. Janubiy hududlarda esa 1 oktyabrgacha iliq ob-havo saqlanadi, ammo 2-3 oktyabrdan boshlab harorat +20…+25 darajagacha pasayishi mumkin.
Shamol tezligi ayrim joylarda 13 dan 18 metr sekundgacha kuchayishi, shuningdek chang-to‘zon kuzatilishi ehtimoli mavjud. Toshkent shahrida 28-30 sentyabr kunlari yog‘ingarchilik bo‘lmaydi.
1 oktyabrda kechasi va ertalab, shuningdek 2 oktyabrda vaqti-vaqti bilan yomg‘ir yog‘ishi mumkin. 3 oktyabrda esa ob-havo yana quruq bo‘ladi.
Shamol yo‘nalishi sharqiydan g‘arbga o‘zgarib, 3-8 metr sekund tezlikda esadi, ba’zan esa 10-12 metr sekundgacha kuchayadi. Toshkentda 29-30 sentyabrda kechasi harorat +15…+17, kunduzi +26…+29 daraja atrofida bo‘ladi.
1-2 oktyabrda kechasi +8…+11, kunduzi +18…+21 darajagacha pasayadi. 3 oktyabrda kechasi +8…+11, kunduzi esa +22…+24 darajada bo‘ladi.
(Manba: O‘zbekiston gidrometeorologiya markazi)
