Milliy statistika qo‘mitasining ma’lumotlariga ko‘ra, 2025 yilning yanvar oyidan avgust oyigacha O‘zbekistonga 7,5 milliondan ortiq xorijiy sayyoh tashrif buyurdi. Bu haqda Zamin.uz xabar berdi.
Bu ko‘rsatkich o‘tgan yilning shu davriga nisbatan 2,5 millionga ko‘p bo‘lib, o‘sish darajasi 49,1 foizni tashkil etdi. Eng ko‘p sayyohlar qo‘shni davlatlardan kelgan.
Xususan, Qirg‘izistondan 2,16 million kishi, bu o‘tgan yilga nisbatan 48,9 foizga ko‘pdir. Qozog‘istondan kelgan sayyohlar soni 1,769 millionni tashkil etib, 73,5 foizga oshgan.
Tojikistondan tashrif buyurganlar soni esa 1,699 million bo‘lib, 15,6 foizga ko‘paygan. Rossiyadan kelgan sayyohlar soni ham o‘sib, 663,2 ming nafarni tashkil qildi, bu esa 25 foizga ko‘pdir.
Afg‘onistondan kelgan sayyohlar birinchi marta yetakchi o‘nlikka kirib, 304,5 ming nafar bilan beshinchi o‘rinni egalladi. Turkmanistondan tashrif buyuruvchilar soni 243,5 ming bo‘lib, u oltinchi o‘rinni egalladi va ikki barobardan ortiq o‘sishni ko‘rsatdi.
Uzoq xorijdan kelgan sayyohlar orasida Xitoydan kelganlar yetakchi bo‘lib, ularning soni 135,4 mingni tashkil etdi. Bu ko‘rsatkich o‘tgan yilga nisbatan uch barobar ko‘pdir.
Sayyohlarning katta qismi, ya’ni 5,16 million kishi, qarindoshlarini ko‘rish maqsadida kelgan. Bundan tashqari, 1,15 million kishi dam olish va sayohat qilish uchun, 837,5 ming nafari xizmat safari bilan, 287,7 ming kishi esa tijorat maqsadida O‘zbekistonga tashrif buyurgan.
Shuningdek, 62 ming kishi davolanish uchun kelgan bo‘lsa, 14,2 ming nafar xorijiy talabalar ta’lim olish maqsadida mamlakatga kelgan. Manba: Milliy statistika qo‘mitasi.
