Og‘ir yuklarga yangi davlat raqamlari joriy etiladi
O‘zbekistonda transport infratuzilmasini himoya qilish va yo‘l harakati xavfsizligini oshirish maqsadida og‘ir yuk mashinalari uchun yangi davlat raqamlari joriy etiladi. Bu haqda Zamin.uz xabar berdi.
So‘nggi yillarda yuk avtomobillari soni keskin oshib, oxirgi o‘n besh yil ichida deyarli uch barobar ko‘paygan. Bu holat yo‘llarga bosimni kuchaytirib, ularning tezroq eskirishiga va yo‘l-transport hodisalarining ko‘payishiga sabab bo‘lmoqda.
2026 yil 1 yanvardan boshlab, yalpi og‘irligi 44 tonnadan yuqori bo‘lgan yuk transport vositalari hamda karerda ishlatiladigan yirik samosvallar uchun maxsus davlat raqamlari joriy qilinadi. Yangi raqamlar qizil fonda oq harf va raqamlardan iborat bo‘lib, “YUK” seriyasida taqdim etiladi.
Ularning chap tomonida hudud kodi, o‘ng tomonida esa davlat bayrog‘i va “UZ” belgisi aks etadi. Mutaxassislarning ta’kidlashicha, bu tizim yo‘l inspektorlariga eng og‘ir transport vositalarini tezda aniqlash imkonini beradi.
Shu bilan birga, yo‘llarning haddan tashqari yuklanishi oldi olinib, ularning tez eskirishi kamayadi. Transport oqimi va tirbandlik tartibga solinar ekan, yo‘llarda baxtsiz hodisalar soni kamayadi va xavfsizlik oshadi.
Shuningdek, yuk mashinalarini tungi vaqtda yo‘l chetida qoldirganlik uchun jazoni kuchaytirish taklif qilinmoqda. Statistik ma’lumotlarga ko‘ra, 2024 yilda faqat shunday holatlar sababli 113 ta yo‘l-transport hodisasi sodir bo‘lgan va 47 kishi halok bo‘lgan.
Yangi tizim nafaqat yo‘l infratuzilmasi xavfsizligini ta’minlaydi, balki og‘ir transport vositalari va ularni boshqaruvchi shaxslar ustidan aniq hisob yuritishni osonlashtiradi. Shu bilan transport nazorati va xavfsizlik darajasi yanada oshadi.
Manba: zamin.uz
