O‘zbekiston AQSh vositachiligidagi kelishuvni qo‘llab-quvvatladi
O‘zbekiston Respublikasi Tashqi ishlar vazirligi Amerika Qo‘shma Shtatlari prezidenti Donald Trampning vositachiligida G‘azo sektorida o‘t ochishni to‘xtatish va garovdagilarni ozod etish bo‘yicha erishilgan kelishuvni ijobiy baholadi. Bu haqda Zamin.uz xabar berdi.
Vazirlikning bayonotida Misr, Qatar va Turkiyaning ushbu jarayondagi hamkorligi va muvofiqlashtirilgan sa’y-harakatlari alohida ta’kidlandi. Mazkur kelishuv zo‘ravonlikni to‘xtatish, gumanitar inqirozni bartaraf etish hamda siyosiy muloqotni tiklash uchun muhim qadam sifatida baholandi.
Shuningdek, O‘zbekiston xalqaro huquq normalari va BMT Xavfsizlik Kengashi rezolyutsiyalari asosida Yaqin Sharqda adolatli va barqaror tinchlikni ta’minlash yo‘lida olib borilayotgan sa’y-harakatlarni qo‘llab-quvvatlashini yana bir bor bildirdi. TIV fikricha, o‘t ochishni to‘xtatish faqat vaqtinchalik choralar emas, balki uzoq muddatli tinchlik va o‘zaro ishonchni mustahkamlashga xizmat qilishi kerak.
Bu kelishuv mintaqadagi barqarorlikni ta’minlash va insonlarning hayotini yaxshilashda muhim ahamiyatga ega. Manba: zamin.uz
