Mol go‘shti narxi 60 yildagi rekordni yangiladi

Jahon banki ekspertlarining ma’lumotlariga ko‘ra, dunyoda mol go‘shti narxi rekord darajada oshdi. Bu haqda Zamin.uz xabar berdi.

Bu holat 1960 yildan beri kuzatilgan eng yuqori ko‘rsatkich sifatida qayd etilgan. 2025 yil sentabr oyida mol go‘shtining bir kilogrammi o‘rtacha 6,9 dollarni, ya’ni taxminan 85 000 so‘mni tashkil etdi.

So‘nggi to‘rt oy davomida narx uzluksiz oshib bormoqda. Avgustdan sentabrgacha narx 0,6 foizga ko‘tarilgan bo‘lsa, yillik o‘sish deyarli 10 foizga yetdi.

Narx oshishining asosiy sabablari sifatida taklifning kamayishi va talabning ortishi ko‘rsatilmoqda. Mol go‘shti narxiga bir nechta omillar ta’sir qiladi.

Ulardan biri chorvachilikda ishlab chiqarish tsiklining uzoq davom etishi, shuningdek, umumiy inflyatsiya darajasining oshishidir. Bundan tashqari, AQSh va Xitoyda mol go‘shtiga bo‘lgan talab kuchaygani sababli narxlar o‘smoqda.

Sut mahsulotlari raqobatbardosh bo‘lmay qolgani tufayli so‘yishga yuborilayotgan chorva soni kamaymoqda. Qurg‘oqchilik natijasida yaylovlar qisqardi va yem narxlari oshdi.

Shu sababli AQShda sigirlar soni 1951 yildan beri eng past darajaga tushdi. Mol go‘shti narxining oshishi dunyo bozorida oziq-ovqat xavfsizligiga ta’sir ko‘rsatmoqda.

Manba: UPL.uz.