Toshkent shahrida o‘tkazilgan “O‘tmishning buyuk merosi — ma’rifatli kelajak poydevori” xalqaro forumi tarixiy voqea sifatida e’tirof etildi. Bu haqda Zamin.uz xabar berdi.
Ushbu forumda ikki yuz yil oldin chop etilgan ilk bosma Qur’onlardan biri O‘zbekistonga tantanali ravishda taqdim etildi. Bu haqida “Madina” nashriyot uyi ma’lumot berdi.
Marosimda Rossiyaning “Madina” nashriyot uyi rahbari Ilyos Saduriy islom sivilizatsiyasi markaziga ushbu noyob hadyani shaxsan topshirdi. Hadya qilingan kitoblar orasida Yekaterina II davrida, 1787 yilda Sankt-Peterburg shahrida nashr etilgan Qur’on alohida ahamiyatga ega bo‘ldi.
Mutaxassislarning fikricha, mazkur mus’haf islom olamida bosma shaklda tayyorlangan ilk va eng to‘liq Qur’on nusxalaridan biridir. Kitobni nashr etish uchun maxsus metall shrift yaratilib, bezaklar ustida tatar xattoti Usmon Ismoil ishlagan.
Tarixiy manbalar bo‘yicha, dastlabki tiraji taxminan 1200 nusxadan iborat bo‘lgan bu Qur’on o‘sha davrda chop etish sohasida katta yutuq hisoblangan. Ushbu nashr nafaqat diniy ahamiyatga ega bo‘lib, balki Rossiyada islom matbaachiligi va adabiyotining rivojiga asos solgan muhim qadam bo‘lgan.
Keyinchalik Qozon shahri aynan shu an’analarni davom ettirib, XIX asrda islom nashriyotining markaziga aylangan. Bu hadya nafaqat tarixiy, balki ma’naviy qimmatga ham ega.
Islom sivilizatsiyasi markazi vakillari uni o‘tmish bilan kelajakni bog‘lovchi ramziy ehson sifatida qabul qilishdi. Shunday qilib, ikki asr davomida dunyo bo‘ylab saqlanib kelgan noyob mus’haf yana bir bor O‘zbekiston yerlariga qaytib, xalqimizning ma’naviy boyliklari sirasiga qo‘shildi.
Manba: Madina nashriyot uyi.
