Mirziyoyev UWW rahbarini qabul qilib, sportni muhokama qildi
O‘zbekiston Prezidenti Shavkat Mirziyoyev 13 oktyabr kuni Birlashgan kurash dunyosi (United World Wrestling, UWW) rahbari Nenad Lalovichni qabul qildi. Bu haqda Zamin.uz xabar berdi.
Uchrashuvda O‘zbekistonda sportning yakkakurash turlarini rivojlantirish, ularni tashkiliy va ekspert darajasida qo‘llab-quvvatlash hamda ommalashtirish masalalari muhokama qilindi. Muzokaralar davomida UWW rahbari mamlakatda sport sohasida amalga oshirilayotgan keng ko‘lamli islohotlarni, xususan, zamonaviy infratuzilmani kengaytirish va yoshlarni sportga keng jalb etish borasidagi ishlarni yuqori baholadi.
Shuningdek, O‘zbekistonda yirik qit’a va jahon chempionatlarini tashkil etish, Mintaqaviy kurash akademiyasini ochish, sport tibbiyoti, diyetologiya va psixologiya sohalarida hamkorlikni rivojlantirish masalalari ko‘rib chiqildi. Prezident Shavkat Mirziyoyev bolalar va yoshlar o‘rtasida yakkakurash turlarini ommalashtirish, iqtidorli sportchilarni saralash va tayyorlashda zamonaviy usullarni joriy etish, shuningdek, mahallalardagi sport infratuzilmasini takomillashtirish muhimligini ta’kidladi.
Uchrashuv so‘ngida Prezident Nenad Lalovichga ommaviy sport va yakkakurash turlarini rivojlantirishdagi shaxsiy hissasi uchun “Do‘stlik” ordenini topshirdi. Manba: zamin.uz
