Mahallalarni rivojlantirish uchun 7 trillion so‘m ajratiladi
Prezident Shavkat Mirziyoyev raisligida mahalla tizimini takomillashtirish va hududlardagi ishlarni samarali tashkil etish bo‘yicha videoselektor yig‘ilishi o‘tkazildi. Bu haqda Zamin.uz xabar berdi.
Yig‘ilishda mahallalardagi infratuzilmani yaxshilash, aholi turmush darajasini oshirish hamda hududlarning barqaror rivojlanishini ta’minlash masalalari muhokama qilindi. Davlat rahbari mahalla tizimi faqat ma’muriy birlik emas, balki jamiyatning yuragi ekanini ta’kidlab, uni zamon talablariga mos ravishda rivojlantirish zarurligini qayd etdi.
Yaqinda qabul qilingan qarorga muvofiq, yangi O‘zbekiston qiyofasi shakllanadigan 33 ta tuman hamda 330 ta og‘ir ahvoldagi mahalla aniqlanadi. Har bir tumanga 100 milliard so‘mdan, har bir mahallaga esa 5 milliard so‘mdan mablag‘ ajratiladi.
Bundan tashqari, Jahon banki va Islom taraqqiyot bankidan jalb qilingan 100 million dollar mablag‘ aynan ushbu hududlardagi loyihalarni amalga oshirishga yo‘naltiriladi. Shuningdek, “drayver” loyihalarini amalga oshirish uchun qo‘shimcha 2 trillion so‘m mablag‘ ajratilishi rejalashtirilgan.
Umuman olganda, dastur doirasida 7 trillion so‘mdan ortiq mablag‘ mahalla hayotini yaxshilashga sarflanadi. Yig‘ilishda viloyat va tuman rahbarlariga aniq vazifalar berildi.
Har bir viloyat hokimi ikki tadan, tuman hokimlari esa bittadan og‘ir ahvoldagi mahallani tanlab, ularni rivojlantirish uchun mas’uliyatni o‘z zimmalariga oladi. Tanlangan mahallalarga 5 milliard so‘mdan mablag‘ ajratilishi natijasida 236 ta mahalla aholisi turmush darajasida sezilarli o‘zgarishlar yuz berishi kutilmoqda.
Dastur doirasida yo‘l, suv, elektr va kommunikatsiya tarmoqlarini yangilash, tadbirkorlikni rivojlantirish, ta’lim va sog‘liqni saqlash infratuzilmasini mustahkamlashga alohida e’tibor qaratiladi. Prezident Mirziyoyev ta’kidlaganidek, mahalla islohotlarning markazi hisoblanadi va xalqning roziligi asosiy mezondir.
Shu sababli, ushbu dastur har bir xonadon hayotiga ijobiy ta’sir ko‘rsatishi, aholida ishonch va yangilanish hissini mustahkamlashi zarur. Yangi tashabbus mahallalarni nafaqat yangilash, balki ularni iqtisodiy, ijtimoiy va ma’naviy jihatdan kuchli markazga aylantirishga qaratilgan bo‘lib, amaliyotga joriy etilishi bilan mahalla hayotida sezilarli o‘zgarishlar yuz beradi.
Manba: zamin.uz
