O‘zbekiston va Afg‘oniston savdo aloqalarini mustahkamlaydi
O‘zbekiston Savdo-sanoat palatasi raisi Davron Vaxabov Afg‘oniston Savdo va investitsiyalar palatasi delegatsiyasi bilan uchrashuv o‘tkazdi. Bu haqda Zamin.uz xabar berdi.
Ushbu delegatsiyaga ACCI raisi o‘rinbosari Ariyan Azimiy rahbarlik qildi. Uchrashuvda ikki davlat o‘rtasidagi savdo-iqtisodiy aloqalarni rivojlantirish, xususiy sektorlar o‘rtasidagi hamkorlikni mustahkamlash hamda o‘zaro investitsiyalarni ko‘paytirish masalalari muhokama qilindi.
Tomonlar har chorakda Toshkent, Qobul, Termiz va Balxda biznes uchrashuvlari tashkil etish, Toshkentda ACCI vakolatxonasini ochish, afg‘on tadbirkorlariga biznes vizalarini soddalashtirish, Termiz portida yuk tashish va bojxona jarayonlarini tezlashtirish hamda har yili qo‘shma savdo ko‘rgazmalarini o‘tkazish kabi muhim tashabbuslarni ilgari surdilar. Bu tashabbuslar ikki tomonlama savdo hajmini oshirish, yangi investitsiya loyihalarini amalga oshirish va tadbirkorlar o‘rtasidagi hamkorlikni rivojlantirishga xizmat qiladi.
Uchrashuv yakunida Davron Vaxabov Afg‘oniston delegatsiyasining tashrifi savdo-iqtisodiy munosabatlarda yangi bosqich ekanligini ta’kidladi (manba: zamin.uz).
