Go‘sht narxlari jahon bozorida rekord darajada oshdi

Birlashgan Millatlar Tashkilotining Oziq-ovqat va qishloq xo‘jaligi tashkiloti (FAO) sentyabr oyiga oid hisobotida jahon bozorida go‘sht narxlari so‘nggi yillardagi eng yuqori darajaga ko‘tarilgani ma’lum qilindi. Bu haqda Zamin.uz xabar berdi.

Hisobotga ko‘ra, sentyabr oyida umumiy oziq-ovqat mahsulotlari narxi biroz pasaygan bo‘lsa-da, go‘sht narxi o‘sishda davom etdi. Ayniqsa qoramol va qo‘y go‘shti narxlari sezilarli darajada oshgani qayd etildi.

Avgust oyiga nisbatan go‘sht narxi 0,7 foizga ko‘tarilib, o‘tgan yilning shu davriga qaraganda 6,6 foizga yuqori bo‘ldi. Tahlilchilar AQShda ichki ta’minot cheklanganligi va import imkoniyatlarining mavjudligi go‘sht narxining oshishiga sabab bo‘lganini ta’kidlashmoqda.

Cho‘chqa va parranda go‘shti narxlari esa deyarli o‘zgarmagan, ammo chorvachilik mahsulotlariga talab sezilarli darajada oshgan. Shu bilan birga, don narxi avgust oyiga nisbatan 0,6 foizga pasaygani qayd etildi.

Bu holat xalqaro bug‘doy bozorida talabning kamayishi va dunyoda mo‘l hosil yetishtirilishi bilan bog‘liqdir. Makkajo‘xori va guruch narxlari ham ayrim mamlakatlar, xususan Filippin va Afrikadagi xaridlarning qisqarishi sabab arzonlashgan.

Yog‘ mahsulotlari bozorida ham narxlar pasayish yo‘nalishida bo‘ldi. Malayziyada palma moyi zahiralari ko‘payishi va Argentinadan soya moyi eksportining oshishi o‘simlik moylari narxini 0,7 foizga pasayishiga olib keldi.

Biroq kungaboqar va raps moylari narxlari biroz oshdi. Sut mahsulotlari narxi esa 2,6 foizga arzonladi.

Bu holat Shimoliy yarimsharda yoz faslining tugashi va muzqaymoqqa bo‘lgan talabning kamayishi, shuningdek, Okeaniyada sut mahsulotlari ishlab chiqarish hajmining ortishi bilan izohlanadi. Masalan, sariyog‘ narxi 7 foizga, quritilgan sut narxi esa asosiy importyorlar talabining kamayishi tufayli ancha pasaydi.

Shakar narxi ham sezilarli darajada, ya’ni avgust oyiga nisbatan 4,1 foizga tushdi. Bunga Braziliyada shakar ishlab chiqarish hajmining oshishi, Hindiston va Tailandda qulay ob-havo sharoitlari hamda qand yetishtirish maydonlarining kengayishi ta’sir ko‘rsatdi.

Natijada shakar narxi 2021 yil mart oyidan beri kuzatilgan eng past darajaga tushdi. Mutaxassislar fikricha, kelgusi oyda don mahsulotlari ishlab chiqarish, iste’mol va zaxira hajmi oshishi kutilmoqda (manba: fco.org).