O‘zbekiston pasporti vizasiz kirish mumkin bo‘lgan mamlakatlar soni bo‘yicha reytingda 82-o‘rinni egalladi. Bu haqda Zamin.uz xabar berdi.
“Henley & Partners” tomonidan e’lon qilingan indeksga ko‘ra, O‘zbekiston fuqarolari 61 ta davlatga vizasiz safar qilishi mumkin. Markaziy Osiyo mamlakatlari orasida eng yuqori natija Qozog‘istonda qayd etilgan.
Qozog‘iston 67-o‘rinni band qilib, 78 ta mamlakatga vizasiz kirish imkoniyatiga ega. Qo‘shni davlatlar reytingda quyidagi o‘rinlarda joylashgan: Qirg‘iziston 81-o‘rin bilan 62 ta davlatga, Tojikiston 87-o‘rin bilan 55 ta davlatga, Turkmaniston esa 93-o‘rin bilan 48 ta davlatga vizasiz kirish huquqiga ega.
Reytingda Singapur 193 ta davlatga vizasiz kirish imkoniyati bilan birinchi o‘rinni saqlab qolgan. Ikkinchi o‘rinda Janubiy Koreya (190 ta davlat), uchinchi o‘rinda Yaponiya (189 ta davlat) turadi.
Amerika Qo‘shma Shtatlari esa ilk bor kuchli o‘ntalikdan chiqib, 12-o‘ringa tushgan. Rossiya esa 46-o‘rindan 50-o‘ringa pasaygan.
Ushbu ma’lumotlar “Henley & Partners” indeksiga asoslanadi.
