Hukumatning 2025 yil 15 oktyabrdagi 642-sonli qaroriga muvofiq, haydovchilarni tayyorlash va qayta tayyorlashni yakunlaganlikni tasdiqlovchi yagona namunadagi elektron guvohnoma joriy etildi. Bu haqda Zamin.uz xabar berdi.
Endilikda avtomototransport va shahar elektr transporti haydovchilarini o‘quv kurslarini muvaffaqiyatli tamomlagan fuqarolarga guvohnoma imtihon komissiyasi bayonnomasi asosida elektron shaklda rasmiylashtiriladi. Elektron guvohnomalar “eavtotalim.uz” platformasi orqali yagona axborot tizimida avtomatik tarzda shakllantiriladi va tadbirkorlik subyektlariga real vaqt rejimida taqdim etiladi.
Eng asosiysi, guvohnoma rasmiylashtirish uchun hech qanday to‘lov yoki yig‘im olinmaydi. Ushbu yangilik haydovchilar uchun qulaylik yaratish va xizmatlarni raqamlashtirish yo‘lida muhim qadam bo‘lib xizmat qiladi.
Batafsil ma’lumotni hukumat qaroridan topish mumkin. (Manba: One.uz)
