O‘zbekiston va Ozarboyjon harbiy hamkorligi kuchaymoqda
20 oktyabr kuni Samarqand shahrida O‘zbekiston mudofaa vaziri general-leytenant Shuhrat Xolmuhammedov va Ozarboyjon mudofaa vaziri general-polkovnik Zakir Gasanov o‘rtasida ikki tomonlama uchrashuv bo‘lib o‘tdi. Bu haqda Zamin.uz xabar berdi.
Uchrashuvda ikki davlat harbiy hamkorligini yanada kengaytirish, qo‘shma tayyorgarlik tizimini takomillashtirish hamda tajriba va amaliy bilim almashuvini yo‘lga qo‘yish masalalari muhokama qilindi. Shuningdek, mamlakatlararo harbiy va harbiy-texnik sohadagi hamkorlikni rivojlantirish, xalqaro terrorizmga qarshi kurashishda o‘zaro hamjihatlikni mustahkamlash borasida fikr almashildi.
Uchrashuvning asosiy maqsadi tinchlik, birlik va barqaror taraqqiyotni ta’minlashga qaratilgan amaliy hamkorlikni rivojlantirishdan iborat bo‘ldi. Keyingi kuni, ya’ni 21 oktyabrda, Ozarboyjon mudofaa vaziri general-polkovnik Zakir Gasanov Markaziy Osiyo davlatlari mudofaa vazirlari bilan birgalikda Markaziy harbiy okrugdagi «Kattaqo‘rg‘on» poligonida o‘tkazilayotgan «Birlik – 2025» mintaqaviy o‘quv mashg‘ulotlarini kuzatdi.
Ushbu mashg‘ulotlarda O‘zbekiston, Qozog‘iston, Tojikiston, Ozarboyjon va Qirg‘iziston mudofaa vazirliklari bo‘linmalari ishtirok etmoqda. Manba: zamin.uz
