Prezident matbuot xizmati lotin alifbosiga o‘tdi
21 oktyabr kuni o‘zbek tiliga davlat tili maqomi berilganining 36 yilligi munosabati bilan prezident matbuot xizmati va uning kotibi sahifalari to‘liq lotin alifbosiga o‘tkazildi. Bu haqda Zamin.uz xabar berdi.
Avvalgi davrda matbuot xizmati ikki alifbodan — kirill va lotindan foydalanib kelgan, ammo ayrim platformalarda kirill alifbosi ustunlik qilardi. Masalan, prezidentning Telegramdagi sahifasi asosan kirill yozuvida yuritilgan.
Endilikda esa barcha rasmiy sahifalar va xabarlar faqat lotin yozuvida taqdim etilmoqda. Dastlab, prezident matbuot kotibi o‘z sahifasida davlat rahbarining Toshkentdagi IT-Parkka tashrifi haqida ma’lumotni lotin alifbosida e’lon qildi.
Shundan so‘ng, Shavkat Mirziyoyevning rasmiy sahifalarida ham shu uslubdagi ma’lumotlar muntazam ravishda joylashtirilmoqda. Bundan tashqari, prezident matbuot xizmatining rasmiy ramzi sifatida ilgari venzel ishlatilgan bo‘lsa, hozirda grafik elementlar sifatida sakkiz qirrali yulduz va davlat bayrog‘i fonidagi Humo qushi tasviri doimiy ravishda qo‘llanilmoqda.
Ushbu o‘zgarish rasmiy axborot manbalarida yagona va zamonaviy uslubni shakllantirishga qaratilgan muhim qadam sifatida baholanmoqda. Ma’lumot manbai: zamin.uz.
