Bryusseldagi Yevropa Kengashi bosh qarorgohida O‘zbekiston Prezidenti Shavkat Mirziyoyev Yevropa Kengashi Prezidenti Antoniu Kos va Yevrokomissiya Prezidenti Ursula fon der Lyayen bilan uchrashuv o‘tkazdi. Bu haqda Zamin.uz xabar berdi.
Uchrashuvda O‘zbekiston va Yevropa Ittifoqi o‘rtasidagi hamkorlikni yanada mustahkamlash masalalari muhokama qilindi. Joriy yil aprel oyida Samarqandda o‘tkazilgan “Markaziy Osiyo—Yevropa Ittifoqi” birinchi sammiti yakunidagi kelishuvlarni amalga oshirish doirasida tomonlar yangi hamkorlik imkoniyatlarini ko‘rib chiqdi.
Uchrashuvda imzolangan “Kengaytirilgan sheriklik va hamkorlik to‘g‘risidagi” bitim tarixiy ahamiyatga ega ekanligi ta’kidlandi. Ushbu bitim savdo, investitsiyalar, transport, energetika, iqlim o‘zgarishi, yuqori texnologiyalar hamda madaniy-gumanitar sohalarda hamkorlikni rivojlantirishga katta hissa qo‘shadi.
Shuningdek, tomonlar O‘zbekistonning Jahon savdo tashkilotiga a’zoligi bo‘yicha Yevropa Ittifoqi bilan olib borilgan muzokaralarni ijobiy baholadi. Uchrashuv davomida energetika, kimyo, muhim minerallar, logistika, to‘qimachilik va farmatsevtika sohalarida umumiy qiymati 10 milliard yevrodan ortiq yangi loyihalarni amalga oshirishga kelishib olindi.
Ushbu hamkorlik ikki tomon uchun iqtisodiy va siyosiy jihatdan muhim ahamiyatga ega. Manba: zamin.uz
