2025-yilda soliqqa oid murojaatlar rekord darajada oshdi
2025-yilning birinchi to‘qqiz oyida fuqarolar tomonidan soliqqa oid qoidabuzarliklar bo‘yicha rekord darajada murojaatlar kelib tushdi. Bu haqda Zamin.uz xabar berdi.
Davlat soliq qo‘mitasining ma’lumotlariga ko‘ra, ushbu murojaatlar asosida jami 24,1 milliard so‘mdan ortiq mukofot pullari to‘lab berildi. Yanvar-sentyabr oylarida “Soliq mobil ilovasi”ning “Soliq hamkor” bo‘limi orqali 82 857 ta huquqbuzarlik haqida xabarlar qabul qilindi.
Bu ko‘rsatkich o‘tgan yilning mos davriga nisbatan qariyb 10 mingga ko‘pdir. Murojaatlarning asosiy qismi chek berilmaganligi bilan bog‘liq bo‘lib, bunday holatlar 74 970 tani tashkil etdi.
Plastik karta orqali to‘lovni rad etish bo‘yicha 3 001 ta holat qayd etildi. Shuningdek, karta orqali to‘lovda narxni sun’iy oshirish 184 marta sodir bo‘lgan.
Boshqa turdagi qoidabuzarliklar esa 4 702 ta holatda aniqlangan. Shu bilan birga, 41 702 ta murojaat takroriy yoki shikoyat ostida tekshirilayotgan tadbirkorlarga tegishli bo‘lgani sababli rad etildi.
Murojaatlar asosida jami 34 196 ta soliq reydlari o‘tkazildi va ularning 98,8 foizida huquqbuzarliklar tasdiqlandi. Natijada, qonunbuzarlikni fosh etgan 34 139 nafar fuqaroga jami 24,1 milliard so‘m miqdorida mukofot pullari to‘landi.
Ushbu mukofotlar aniqlangan jarimalarning 20 foizini tashkil qiladi. Ma’lumotlar Davlat soliq qo‘mitasining rasmiy statistikasi asosida taqdim etildi.
