Isrofgarchilikni kamaytirish uchun yangi dastur qabul qilindi
O‘zbekistonda to‘y va boshqa ma’rakalarda isrofgarchilikni kamaytirish, madaniyatni me’yoriy va milliy qadriyatlarga asoslab shakllantirish maqsadida yangi dastur ishlab chiqildi. Bu haqda Zamin.uz xabar berdi.
Ushbu tashabbus Respublika Ma’naviyat va Ma’rifat markazi tomonidan bir qator tashkilotlar bilan hamkorlikda e’lon qilindi. Davlat va jamoat tashkilotlari vakillari ishtirokida o‘tkazilgan davra suhbatida “maromiylik madaniyati”ni keng targ‘ib qilish uchun 90 kunlik chora-tadbirlar rejasi tasdiqlandi.
Bu reja doirasida aholiga isrofgarchilik va ortiqcha dabdabadan tiyilish, ijtimoiy ongni oshirish, shuningdek, tadbirlarni ixcham va samimiy ruhda o‘tkazish tavsiya etiladi. Dastur Ma’naviyat markazi, Mahallalar uyushmasi, Din ishlari bo‘yicha qo‘mita, Oila va xotin-qizlar qo‘mitasi hamda “Nuroniy” jamg‘armasi ishtirokida amalga oshiriladi.
Unga ko‘ra, targ‘ibot tadbirlari, seminarlar, ochiq suhbatlar va yoshlar bilan uchrashuvlar tashkil etiladi. Shuningdek, “Kinokarvon” media loyihasi orqali isrofgarchilikka qarshi film va roliklar tayyorlanib, yoshlar ongiga sog‘lom qarashlar singdiriladi.
Ushbu tashabbus milliy qadriyatlarni asrash, to‘y-ma’rakalarni kamxarj va samimiy o‘tkazish hamda moliyaviy bosimlarni kamaytirish orqali jamiyatda sog‘lom muhitni mustahkamlashga xizmat qiladi (manba: zamin.uz).
