Surxondaryo viloyatining tarixiy va madaniy jihatdan boy hududi hisoblangan Jarqo‘rg‘on tumani yana bir muhim yutuqqa erishdi. Bu haqda Zamin.uz xabar berdi.
Endilikda bu hududning mashhur milliy taomi bo‘lgan “Jarqo‘rg‘on tandir go‘shti” geografik ko‘rsatkich sifatida davlat ro‘yxatiga kiritildi. Bu orqali taom faqat Surxondaryo mintaqasiga xos gastronomik brend sifatida qonuniy himoyaga ega bo‘ladi.
Ma’lumotlarga ko‘ra, ushbu taomning o‘ziga xosligi hududning tabiiy iqlimi va mahalliy mahsulotlar bilan chambarchas bog‘liqdir. Jarqo‘rg‘onning issiq va quruq havosi, yaylovlarda boqilgan hisori qo‘zilar go‘shti, shuningdek tandirda archa shoxlaridan yoqilgan olov taomga o‘ziga xos mazmun va hid baxsh etadi.
“Jarqo‘rg‘on tandir go‘shti” odatda 400 daraja atrofida qizdirilgan yer tandirda bir yarimdan ikki soatgacha bug‘ va issiqlik ta’sirida pishiriladi. Bu jarayonda go‘sht tashqi tomondan qizaradi, ichidagi shira esa saqlanib qoladi.
Natijada taom nafaqat mazali, balki parhezga ham mos keluvchi xususiyatlarga ega bo‘ladi. Geografik ko‘rsatkich sifatida ro‘yxatga olinishi taom nomining noqonuniy ishlatilishining oldini oladi va asl retsepturani himoya qiladi.
Bu esa mahsulot sifatining yagona standartlar asosida ta’minlanishiga xizmat qilib, Jarqo‘rg‘on brendining xalqaro miqyosda tan olinishiga yordam beradi. Mutasaddilarning ta’kidlashicha, “Jarqo‘rg‘on tandir go‘shti” nafaqat milliy taom sifatida, balki hududning iqtisodiy va turistik salohiyatini kengaytiruvchi brend sifatida ham katta ahamiyat kasb etadi.
Endilikda ushbu taom Surxondaryo gastronomik merosining eng yorqin namunalaridan biriga aylanishi kutilmoqda. Geografik ko‘rsatkich tushunchasi ma’lum hudud bilan bog‘liq mahsulot sifati va obro‘sini kafolatlaydigan intellektual mulk hisoblanadi.
U mahsulotning haqiqiy kelib chiqishini aniqlaydi, iste’molchida ishonch uyg‘otadi va ishlab chiqaruvchilarga qo‘shimcha iqtisodiy imkoniyatlar yaratadi. Shu tariqa, “Jarqo‘rg‘on tandir go‘shti” nafaqat Surxondaryo taomlarining iftixori, balki O‘zbekiston milliy gastronomiyasining yana bir yuksak namunasi sifatida tarixga kirib bormoqda (manba: zamin.uz).
