Moped haydovchilari uchun guvohnoma olish yengillashadi
O‘zbekistonda moped va skuter egalari uchun haydovchilik guvohnomasini olish jarayoni 2026-yildan boshlab soddalashtiriladi. Bu haqda Zamin.uz xabar berdi.
Hukumat tomonidan qabul qilingan yangi qarorga muvofiq, 1-yanvardan boshlab «A1» kichik toifali guvohnoma joriy etiladi. Endi talabgorlar 180 soatlik nazariy va 20 soatlik amaliy o‘quv kurslarini majburiy tarzda o‘tash shart emas.
Ular to‘g‘ridan-to‘g‘ri nazariy imtihon topshirishlari mumkin bo‘ladi. Imtihonda 20 ta test savolining kamida 16 tasiga to‘g‘ri javob berish talab qilinadi.
Talabgorlar o‘quv kurslarini onlayn yoki oflayn shaklda o‘zlari tanlagan tarzda o‘rganishlari yoki mustaqil tayyorlanish imkoniga ega bo‘ladi. Shuningdek, «A», «B», «C» va «D» toifalariga ega bo‘lgan haydovchilar alohida hujjat olish shartisiz «A1» toifasidagi transport vositalarini boshqarish huquqiga ega bo‘ladi.
2026-yil 1-fevraldan boshlab esa «A» va «B» toifalari uchun ham nazariy mashg‘ulotlarni mustaqil o‘zlashtirish imkoniyati yaratiladi. Bu o‘quv jarayonini yanada qulaylashtirib, vaqt va xarajatlarni kamaytirishga xizmat qiladi.
Bundan tashqari, 2026-yil 1-apreldan yo‘l harakati xavfsizligini oshirish maqsadida avtomatik kamera tizimlari orqali qayd etiladigan 12 turdagi qoidabuzarlik uchun jarima ballari tizimi joriy etiladi. Muhimi, jarima ballari endilikda transport vositasi egasiga emas, balki qoidabuzarlikni sodir etgan haydovchiga yoziladi.
Ushbu o‘zgarishlar mamlakatimizda haydovchilik tizimini yanada takomillashtirish va yo‘l harakati xavfsizligini oshirishga qaratilgan. Batafsil ma’lumotni one.uz saytidan topishingiz mumkin.
