Yo‘l qoidalarini buzganlarga jarima ballari joriy etiladi
O‘zbekiston Respublikasi Vazirlar Mahkamasining 2025-yil 25-oktyabrdagi 676-sonli qaroriga muvofiq, 2026-yil 1-apreldan boshlab yo‘llarda o‘rnatilgan avtomatlashtirilgan foto va video nazorat tizimlari orqali qayd etilgan yo‘l harakati qoidalarini buzganlik uchun haydovchilarga jarima ballari berila boshlaydi. Bu haqda Zamin.uz xabar berdi.
Ushbu yangilik yo‘l harakati xavfsizligini oshirish va yo‘l-transport hodisalarini kamaytirishga qaratilgan. Endilikda radar yoki kamera orqali aniqlangan qoidabuzarliklar uchun ham ball beriladi.
Ballar transport vositasiga egalik qiluvchi shaxsga yoki ishonchnoma, sug‘urta polisi hamda yo‘l varaqasi asosida undan foydalangan haydovchiga nisbatan qo‘llanadi. Jarima ballari tizimi 2025-yil 1-iyundan boshlab faqat YHXX xodimlari tomonidan rasmiylashtirilgan holatlar uchun amal qilgan bo‘lsa, endi kamera tizimlari yordamida ham haydovchilar aniqlanadi va jarima ballari belgilanadi.
Qarorga ko‘ra, agar haydovchi 12 oy davomida yo‘l harakati qoidalarini buzmasa, keyingi birinchi qoidabuzarlik uchun ball hisoblanmaydi. Bundan tashqari, agar haydovchi olti oy davomida yangi qoidabuzarlik qilmasa, undagi ikki ball olib tashlanadi.
Agar bir yil ichida haydovchining jarima ballari 12 taga yetib borsa, bu haqda ma’lumot sudga avtomatik tarzda yuboriladi. Sud qaroriga binoan, bunday haydovchilar 6 oydan 3 yilgacha haydovchilik guvohnomasidan mahrum qilinishi mumkin.
Mutaxassislar ta’kidlashicha, yangi tizim nafaqat javobgarlikni kuchaytiradi, balki haydovchilarni yo‘l qoidalariga qat’iy amal qilishga rag‘batlantiradi. Bu esa yo‘llarda xavfsizlikni oshirishga xizmat qiladi.
Ushbu ma’lumotlar One.uz saytidan olindi.
