Mol go‘shti narxi yil boshidan 23 foizga oshdi
O‘zbekiston bozorida go‘sht narxi sezilarli darajada oshgan. Bu haqda Zamin.uz xabar berdi.
Uz24 saytining xabar berishicha, yil boshidan buyon mol go‘shti narxi 23 foizga qimmatlagan. Bu masala 24-oktyabr kuni Markaziy bank boshqaruvi raisi Timur Ishmetov ishtirokida bo‘lib o‘tgan matbuot anjumanida muhokama qilindi.
Ishmetovning ma’lumotiga ko‘ra, sentyabr oyida umumiy inflyatsiya darajasi 8 foizgacha pasaygan bo‘lsa-da, ijtimoiy ahamiyatga ega tovarlar narxi yuqori darajada qolmoqda. Xususan, yil davomida mol go‘shti narxi 23,2 foizga oshib, bir kilogrammi o‘rtacha 108 ming so‘mni tashkil etmoqda.
Shuningdek, kartoshka narxi 18,5 foizga, benzin narxi esa 11,8 foizga qimmatlagan. Narxlarni barqarorlashtirish maqsadida hukumat tegishli vazirlik va idoralar bilan hamkorlikda muayyan chora-tadbirlarni amalga oshirmoqda.
Kelgusida inflyatsiyani past darajada ushlab turish uchun ichki bozorda raqobatni kuchaytirish, tarif va notarif cheklovlarni kamaytirish, energiya resurslarini uzluksiz yetkazib berish va transport infratuzilmasini rivojlantirishga e’tibor qaratilmoqda. Ushbu choralar iqtisodiy barqarorlikni ta’minlash hamda asosiy tovarlar narxining barqarorligini saqlab qolishga xizmat qilishi kutilmoqda.
