O‘zbekiston Afg‘onistonga elektr eksportini oshiradi
O‘zbekiston va Afg‘oniston o‘rtasidagi energetika sohasidagi hamkorlik yangi bosqichga chiqmoqda. Bu haqda Zamin.uz xabar berdi.
Yaqin kelajakda O‘zbekiston Afg‘onistonga elektr energiyasi eksportini bir necha barobar oshirishi kutilmoqda. Ushbu rejalar "Surxon - Puli-Xumri" yuqori kuchlanishli elektr uzatish liniyasining qurilishi yakunlangach amalga oshiriladi.
Bu haqda O‘zbekiston Energetika vaziri Jo‘rabek Mirzamahmudov 28-oktabr kuni o‘tkazilgan matbuot anjumanida ma’lum qildi. Vazirning ta’kidlashicha, Afg‘oniston bilan energetika sohasidagi hamkorlik izchil rivojlanmoqda.
U so‘nggi ikki oy ichida Afg‘onistonga uch marta tashrif buyurganini aytib, mamlakatda iqtisodiyotni rivojlantirish uchun elektr energiyasi muhim ahamiyatga ega ekanini qayd etdi. Shuningdek, Afg‘oniston tomoni moliyaviy intizomga jiddiy e’tibor qaratayotganini va avvalgi qarzlarni to‘liq to‘laganini bildirdi.
Hamkorlikni kengaytirishning asosiy qismi 500 kV kuchlanishga ega "Surxon - Puli-Xumri" elektr uzatish liniyasining qurilishi hisoblanadi. Mazkur loyiha bo‘yicha ishlar sentabr oyida imzolangan shartnoma asosida boshlangan.
Qurilish 18 oy ichida, ya’ni 2027-yilning 1-apreligacha yakunlanishi rejalashtirilgan. Loyiha umumiy qiymati 250 million AQSh dollariga teng bo‘lib, 200,6 kilometr uzunlikdagi elektr liniyasi, yangi podstansiyalar va boshqa infratuzilmani o‘z ichiga oladi.
Shuningdek, ikki davlat o‘rtasidagi iqtisodiy aloqalar ham mustahkamlanmoqda. Joriy yilning to‘qqiz oyida o‘zaro savdo hajmi 1,5 barobar oshib, 1,15 milliard AQSh dollariga yetdi.
O‘zbekistonning Afg‘onistonga elektr energiyasi eksporti esa 114,8 million dollarni tashkil etdi, bu o‘tgan yilga nisbatan sezilarli darajada yuqori. Afg‘oniston iste’mol qilinadigan elektr energiyasining 80 foizini import qiladi.
O‘zbekiston esa Tojikiston, Turkmaniston va Eron bilan bir qatorda Afg‘onistonga asosiy elektr energiyasi yetkazib beruvchilardan biri hisoblanadi. O‘zbekiston 2002-yildan buyon Afg‘onistonga elektr energiyasi yetkazib kelmoqda va bu hamkorlik 2025-yilgacha davom ettirilishi belgilangan.
