Qanqada V–VIII asrlarga oid ibodatxona topildi
Toshkent viloyatidagi Qanqa yodgorligi hududida muhim arxeologik topilma aniqlandi. Bu haqda Zamin.uz xabar berdi.
O‘zbekiston Fanlar akademiyasi ma’lumotlariga ko‘ra, bu hududda V–VIII asrlarga tegishli qadimiy ibodatxona va harbiy anjomlar topilgan. Fanlar akademiyasi Tarix instituti va Toshkent viloyati hokimligi hamkorligida olib borilayotgan tadqiqotlar Qanqani “Ochiq osmon ostidagi muzey”ga aylantirish maqsadida amalga oshirilmoqda.
Mutaxassislarning fikricha, Qanqa Turon tarixi uchun muhim shahar bo‘lib, ayrim olimlar uni "Avesto"dagi Qang‘desh va "Shohnoma"da tilga olingan Qang‘dez bilan bog‘laydi. Bu yilgi qazuv ishlari davomida yodgorlikning quyi qismida joylashgan ibodatxonadan metalldan ishlangan qadimiy sovut bo‘laklari topildi.
Tadqiqotchilarning taxminicha, bu buyumlar jangchilar tomonidan ibodatxonaga sovg‘a sifatida keltirilgan bo‘lishi mumkin. Qadim zamonlarda ibodatxonalar nafaqat diniy maskan, balki xalq madaniyatining ajralmas qismi bo‘lgan.
Har bir inson o‘zining qadrli buyumini muqaddas joyga olib kelib, yodgorlik sifatida qoldirgan. Mutaxassislarning ta’kidlashicha, Qanqa ibodatxonasida topilgan harbiy anjomlar turkiy xalqlarning qurol yasash san’ati va harbiy madaniyatining yuqori darajada rivojlanganini ko‘rsatadi.
2021-yildan beri olib borilayotgan qazuv ishlari davomida ibodatxona kirish qismida ot anjomlari ham aniqlangan edi. Bu yil esa sovut bo‘laklarining topilishi turkiy xalqlarning jang san’ati va harbiy an’analarga katta e’tibor berganini yana bir bor tasdiqlaydi.
Qanqa yodgorligi nafaqat tarixiy ahamiyatga ega, balki milliy g‘urur va tarixiy xotirani tiklashda muhim rol o‘ynaydi. Arxeologlar bu hududni kelajakda sayyohlar uchun ochiq muzeyga aylantirishni rejalashtirishmoqda.
Eslatib o‘tish joiz, yaqinda Misrda ham arxeologlar Kleopatra davriga oid cho‘kkan portni topishgan edi. Bu kabi kashfiyotlar insoniyatning boy madaniy merosi va o‘tmishdagi sirli voqealar haqida ko‘proq ma’lumot olish imkonini beradi.
Manba: Zamin.uz
