AQSh prezidenti Donald Tramp O‘zbekiston bilan muhim savdo-iqtisodiy bitim imzolanganini ma’lum qildi. Bu haqda Zamin.uz xabar berdi.
Ushbu xabarni u o‘zining ijtimoiy tarmoqdagi sahifasida e’lon qilgan. Bitimga ko‘ra, kelgusi uch yil davomida O‘zbekiston AQShning bir qator strategik sohalariga, jumladan, foydali qazilmalar, aviatsiya, avtomobil qismlari ishlab chiqarish, infratuzilma, qishloq xo‘jaligi, energetika, kimyo va axborot texnologiyalari yo‘nalishlariga qariyb 35 milliard dollar sarmoya kiritishi rejalashtirilgan.
Shuningdek, keyingi o‘n yil ichida bu ko‘rsatkich 100 milliard dollardan oshishi kutilmoqda. Tramp o‘z bayonotida O‘zbekiston prezidenti Shavkat Mirziyoyevni “yuksak hurmatli davlat rahbari” deb atab, unga minnatdorlik bildirgan.
Shuningdek, u ikki mamlakat o‘rtasidagi uzoq muddatli va samarali hamkorlikni orziqib kutayotganini ta’kidlagan. Mazkur kelishuv O‘zbekiston va AQSh o‘rtasidagi savdo-iqtisodiy aloqalarni yangi bosqichga olib chiqishi kutilmoqda.
Bu esa ikki davlat o‘rtasida yanada mustahkam hamkorlikni ta’minlashga xizmat qiladi. Manba: One.uz
