Shavkat Mirziyoyev AQSH kompaniyalari bilan hamkorlikni kengaytirdi
O‘zbekiston Respublikasi Prezidenti Shavkat Mirziyoyev Vashington shahriga amalga oshirgan tashrifi doirasida AQSHning yetakchi kompaniyalari, investitsiya fondlari va moliya institutlari vakillari bilan uchrashuv o‘tkazdi. Bu haqda Zamin.uz xabar berdi.
Ushbu tadbirda AQSH savdo vaziri, Prezidentning maxsus yordamchilari va qator yirik kompaniyalar rahbarlari ishtirok etdilar. Uchrashuv davomida Prezident Mirziyoyev O‘zbekiston va AQSH o‘rtasidagi strategik sheriklikning yangi bosqichga ko‘tarilayotganini ta’kidladi.
Davlatimiz rahbari so‘nggi sakkiz yil ichida O‘zbekiston va AQSH o‘rtasidagi tovar ayirboshlash hajmi to‘rt barobarga oshgani, mamlakatimizda AQSHning 300 dan ortiq kompaniyasi muvaffaqiyatli faoliyat yuritayotganini qayd etdi. Uchrashuv davomida iqtisodiy hamkorlikning ustuvor yo‘nalishlari, jumladan, energetika, transport infratuzilmasi va raqamli texnologiyalar sohasidagi loyihalar muhokama qilindi.
O‘zbekiston 2030-yilgacha 18-20 gigavattlik qayta tiklanuvchi energiya quvvatlarini yaratishni rejalashtirgan. Ushbu energiya tizimining yarmidan ko‘p qismi quyosh va shamol manbalaridan olinishi ko‘zda tutilgan.
Shuningdek, AQSH bilan birgalikda uran, mis, volfram, molibden va grafitni qazib olish va qayta ishlashni rivojlantirish rejalashtirilmoqda. Transport infratuzilmasini modernizatsiya qilish bo‘yicha ham keng ko‘lamli ishlar olib borilmoqda.
2030-yilgacha ushbu sohani rivojlantirish uchun 12 milliard dollardan ortiq mablag‘ yo‘naltirilishi mo‘ljallangan. Shuningdek, raqamli texnologiyalar sohasida “Google”, “Meta” va “NVIDIA” kabi kompaniyalar bilan hamkorlik kengaymoqda.
Apple Pay va Google Pay kabi to‘lov tizimlarini joriy etish, Raqamli akademiya va startap-xablar tarmog‘ini yaratish ishlari amalga oshirilmoqda. Prezident Shavkat Mirziyoyev uchrashuv yakunida AQSH kompaniyalarining investitsiya tashabbuslarini qo‘llab-quvvatlashga tayyorligini bildirib, O‘zbekiston xorijiy investorlar uchun ishonchli hamkor bo‘lib qolishini ta’kidladi.
Manba: Zamin.uz
