Mehnat migrantlari uchun yangi sug‘urta tizimi joriy etildi
O‘zbekiston hukumati xorijda mehnat qilayotgan fuqarolarni qo‘llab-quvvatlash maqsadida yangi ixtiyoriy sug‘urta tizimini joriy etishga qaror qildi. Bu haqda Zamin.uz xabar berdi.
Ushbu tizim mehnat migrantlarining huquqlari, hayoti va sog‘lig‘ini himoya qilishga qaratilgan. Yangi tartib Migratsiya agentligi tashabbusi bilan ishlab chiqilib, fuqarolarning moliyaviy barqarorligini ta’minlash va tibbiy yordamdan foydalanish imkoniyatlarini kengaytirishni nazarda tutadi.
Ushbu tizim doirasida sug‘urta kompaniyalariga migrantlar uchun maxsus tariflar va sug‘urta mahsulotlarini ishlab chiqish tavsiya etilgan. Natijada, xorijda ishlayotgan fuqarolar hayoti va sog‘lig‘ini sug‘urtalash, patent olish yoki ishlash ruxsatnomasi rad etilganda yuzaga kelishi mumkin bo‘lgan moliyaviy yo‘qotishlarni qoplash imkoniyatiga ega bo‘lishadi.
Shuningdek, xorijda ishga joylashish uchun olingan kreditlarning qaytmasligi xavfi ham sug‘urta qilinadi. Sug‘urta tashkilotlari O‘zbekiston hududida yoki migrant ishlayotgan mamlakatda tibbiy yordamni tezkor tashkil etish majburiyatini zimmasiga oladi.
Sug‘urta qoplamasi fuqaro tomonidan to‘langan valyutada amalga oshiriladi. Uzoq muddatli hayot sug‘urtasi shartnomalari bo‘yicha sug‘urtalanuvchi vafot etganda yoki I–II guruh nogironligi aniqlanganda to‘liq qoplama to‘lanadi.
Agar sug‘urtalanuvchi belgilangan yoshga yetsa, unga sug‘urta summasi bilan birga investitsiya daromadidan ulush ham beriladi. Bundan tashqari, hayot sug‘urtasiga yo‘naltirilgan mukofotlarning kamida 30 foizi va sug‘urta muddati 12 oydan oshgan hollarda, pul o‘tkazish xarajatlari ham to‘liq qoplanadi.
Mehnat migrantlariga oid ushbu sug‘urta tartibi huquqiy hujjat sifatida tasdiqlangan va ilova shaklida qabul qilingan. Mazkur tizim fuqarolarning xorijda ishlash jarayonini xavfsiz va ishonchli qiladi.
Shu bilan birga, mehnat migrantlarining oilalarini moliyaviy barqarorlik bilan ta’minlashga xizmat qiladi. Bu davlat tomonidan xorijdagi fuqarolarning huquqlarini himoya qilishga qaratilgan muhim qadamdir.
Manba: one.uz.
