O‘zbekistonda narkojinoyatlar uchun jazo kuchaytirildi
O‘zbekistonda giyohvandlikka qarshi kurash doirasida yangi va qat’iy choralar ko‘rilmoqda. Bu haqda Zamin.uz xabar berdi.
Bu haqda rasmiy manbalar xabar berdi. Yangi qonunga muvofiq, og‘ir narkojinoyatlar sodir etgan shaxslarga nisbatan jazo chorasi kuchaytiriladi.
Xususan, narkotik moddalarni noqonuniy ishlab chiqarish, tarqatish yoki narkouyushma tashkil etish kabi jinoyatlar uchun 20 yilgacha ozodlikdan mahrum qilish jazosi belgilandi. Shuningdek, narkotik moddalarni mansab vakolatini suiiste’mol qilib muomalaga kiritish, transchegaraviy yoki onlayn tarqatish kabi holatlar ham og‘ir jinoyatlar sifatida baholanadi.
Jamoat joylarida giyohvandlik vositalarini iste’mol qilgan shaxslar uchun 15 sutkagacha ma’muriy qamoq jazosi qo‘llanishi mumkin. Bundan tashqari, voyaga yetmaganlar va yoshlar ishtirokida sodir etilgan narkojinoyatlar og‘irlashtiruvchi holat sifatida ko‘riladi.
Ta’lim muassasalari, talabalar yotoqxonalari yoki bolalar oromgohlari hududida narkotik moddalarni tarqatish holatlari yuzasidan javobgarlik yanada kuchaytiriladi. Mazkur chora-tadbirlar mamlakatda narkojinoyatlarni kamaytirish, yoshlarni turli zararli illatlardan himoya qilish va jamoat xavfsizligini ta’minlashga qaratilgan.
