Belgiya Toshkentda elchixona ochishga tayyorlanmoqda
Belgiya Toshkent shahrida o‘z elchixonasini ochishga tayyorlanmoqda. Bu haqda Zamin.uz xabar berdi.
Bu haqda mamlakat tashqi ishlar vaziri Maksim Prevo ma’lum qilgan. Ushbu qadam Belgiya va Markaziy Osiyo o‘rtasidagi hamkorlikni kengaytirish maqsadida amalga oshirilmoqda.
Belgiyaning tashqi ishlar vazirligi ta’kidlashicha, Markaziy Osiyo strategik ahamiyatga ega hudud sifatida baholanib, mintaqadagi ishtirokni kuchaytirish milliy manfaatlar doirasida ko‘rilmoqda. Maksim Prevo o‘z bayonotida diplomatik vakolatxonalar tarmog‘ining xalqaro maydonda Belgiyaning manfaatlarini himoya qilishda muhim ahamiyatga ega ekanini qayd etdi.
U zamonaviy geosiyosiy sharoitda bu tarmoqning yanada faol va samarali bo‘lishi zarurligini ta’kidladi. Belgiya tashqi ishlar vazirligining ma’lumotiga ko‘ra, Transkaspiy koridori orqali Yevropa va Osiyoni bog‘laydigan yangi logistika yo‘nalishlari aynan O‘zbekiston ishtirokida shakllanmoqda.
Belgiya bu jarayonda faol ishtirokni strategik investitsiya sifatida ko‘radi. Mutaxassislar fikricha, Toshkentda elchixona ochilishi Belgiya uchun mintaqadagi siyosiy va iqtisodiy jarayonlarni yaqindan kuzatish, yangi hamkorlik imkoniyatlarini aniqlash va xavflarni baholash imkonini beradi.
Ushbu qaror O‘zbekiston va Yevropa davlatlari o‘rtasidagi aloqalarni yangi bosqichga olib chiqishi kutilmoqda. Ma’lumot manbasi: One.uz.
