Markaziy Osiyo davlatlari rahbarlarining VII Maslahat uchrashuvi muhim voqealardan biri bo‘ldi. Bu haqda Zamin.uz xabar berdi.
Unda O‘zbekiston Respublikasi Prezidenti Shavkat Mirziyoyev bir qator dolzarb tashabbuslar bilan chiqish qildi. Uchrashuvda Ozarbayjon Respublikasining yangi ishtirokchi sifatida qo‘shilishi davlat rahbarlari tomonidan qo‘llab-quvvatlandi.
Prezident Mirziyoyev bu qadamni mintaqaviy hamkorlikning yangi bosqichi deb atadi va Markaziy Osiyo hamda Janubiy Kavkaz o‘rtasida yagona hamkorlik makonini shakllantirish muhimligini ta’kidladi. Davlat rahbari o‘z nutqida mintaqani rivojlantirish bo‘yicha bir nechta ustuvor yo‘nalishlarni belgilab berdi.
Birinchidan, mintaqaviy integratsiyaning yangi bosqichi haqida so‘z yuritilib, Markaziy Osiyo davlatlari muloqotning maslahat shaklidan amaliy hamkorlik bosqichiga o‘tganini qayd etdi. Savdo hajmi 10,7 milliard dollarga yetgani, investitsiyalar esa 17 foizga oshgani bu jarayonning natijalaridan dalolat beradi.
Ikkinchidan, institutsional arxitekturani mustahkamlash masalasi ko‘tarildi. Prezident “Markaziy Osiyo hamjamiyati” strategik platformasini yaratish, Kotibiyatni tashkil etish, Oqsoqollar kengashini tuzish va milliy muvofiqlashtiruvchilar maqomini oshirishni taklif qildi.
Uchinchidan, iqtisodiy hamkorlikni chuqurlashtirishga alohida e’tibor qaratildi. Savdo-iqtisodiy hamkorlikning mintaqaviy dasturini qabul qilish, yagona investitsiya makonini yaratish va elektron tijoratni rivojlantirish bo‘yicha takliflar ilgari surildi.
To‘rtinchidan, infratuzilma va transport masalalari muhokama qilindi. Xususan, "Xitoy-Qirg‘iziston-O‘zbekiston" temir yo‘li va boshqa yirik loyihalarni birgalikda amalga oshirish zarurligi qayd etildi.
Beshinchidan, xavfsizlik va Afg‘oniston bilan bog‘liq masalalar ko‘rib chiqildi. Prezident Afg‘onistonning mintaqaviy energetika va transport loyihalariga qo‘shilishi muhimligini ta’kidladi va “Farg‘ona tinchlik forumi”ni xalqaro anjumanga aylantirishni taklif etdi.
Oltinchidan, iqlim va suv masalalariga e’tibor qaratilib, 2026-2036-yillarni “Markaziy Osiyoda suvdan oqilona foydalanish bo‘yicha amaliy harakatlar o‘n yilligi” deb e’lon qilish taklif qilindi. Yettinchidan, gumanitar sohadagi hamkorlikni rivojlantirish masalalari muhokama qilindi.
Har yili ma’naviy merosga bag‘ishlangan Xalqaro kongressni o‘tkazish va mintaqaviy ilmiy tadqiqotlar jamg‘armasini tashkil etish takliflari ilgari surildi. Prezident o‘z nutqini quyidagi so‘zlar bilan yakunladi: “Bizning kuchimiz – birlikda, muvaffaqiyat sari yo‘limiz – do‘stlik va hamkorlikda”.
Shuningdek, O‘zbekiston Turkmanistonni yangi formatdagi uchrashuvga raislikni qabul qilgani bilan tabriklab, uning sa’y-harakatlarini har tomonlama qo‘llab-quvvatlashga tayyorligini bildirdi.
