O‘zbekiston Janubi-Sharqiy Osiyo bilan hamkorlikni kuchaytiradi
O‘zbekiston Janubi-Sharqiy Osiyoda do‘stlik va hamkorlik to‘g‘risidagi bitimga qo‘shiladi. Bu haqda Zamin.uz xabar berdi.
Bu haqda Kuala-Lumpurda bo‘lib o‘tgan ASEANga a’zo davlatlar tashqi ishlar vazirlari uchrashuvida qaror qabul qilindi. Mazkur bitim O‘zbekistonning Janubi-Sharqiy Osiyo mintaqasi bilan savdo-iqtisodiy va investitsiyaviy aloqalarini yanada rivojlantirishga xizmat qiladi.
Janubi-Sharqiy Osiyoda do‘stlik va hamkorlik to‘g‘risidagi bitim ilk bor 1976 yil 24 fevralda Indoneziyaning Bali shahrida imzolangan. Ushbu hujjat mintaqadagi davlatlar o‘rtasidagi hamkorlikning asosiy tamoyillarini belgilaydi.
Jumladan, qonuniylikka rioya qilish, tinchlikni mustahkamlash hamda kelib chiqadigan nizolarni oqilona va moslashuvchan choralar bilan hal qilish kabi prinsiplar bitim asosida mustahkamlangan. O‘zbekistonning mazkur hujjatga qo‘shilishi xalqaro hamkorlikni kengaytirish va yangi investitsion imkoniyatlarni jalb etishda muhim qadam bo‘lib, mamlakatning mintaqadagi mavqeini mustahkamlashga xizmat qiladi.
Manba: zamin.uz
