2024 yilda Yevropa tiklanish va taraqqiyot banki Markaziy Osiyo mintaqasiga 2,26 milliard dollar miqdorida rekord darajadagi mablag‘ yo‘naltirdi. Bu haqda Zamin.uz xabar berdi.
Ushbu mablag‘ning 938 million dollari O‘zbekiston hissasiga to‘g‘ri kelgan. Bu ko‘rsatkichlar Toshkent shahrida o‘tkazilgan «Yevropa Ittifoqi – Markaziy Osiyo» uchinchi Iqtisodiy forumida muhokama qilindi.
Tadbirda 32 mamlakatdan 400 dan ortiq ishtirokchi qatnashdi. So‘nggi yetti yil davomida Yevropa Ittifoqi va Markaziy Osiyo davlatlari o‘rtasidagi savdo hajmi to‘rt barobarga oshib, 54 milliard yevroga yetgani qayd etildi.
Shuningdek, Yevropa Ittifoqi mintaqaga 100 milliard yevrodan ortiq to‘g‘ridan-to‘g‘ri investitsiyalar yo‘naltirgan bo‘lib, u Markaziy Osiyodagi eng yirik investor sifatida o‘z mavqeini mustahkamlab kelmoqda. O‘zbekiston bosh vaziri o‘rinbosari Jamshid Xo‘jayevning so‘zlariga ko‘ra, Yevropa Ittifoqi bilan aloqalar izchil mustahkamlanib, yangi bosqichga o‘tmoqda.
Forum davomida biznes muhitini yaxshilash, investitsiyalarni jalb qilish, qo‘shilgan qiymat zanjirlarini rivojlantirish, kadrlar tayyorlash va mintaqaviy integratsiyani chuqurlashtirish kabi masalalar ko‘rib chiqildi. Tadbir yakunida ekologiya, sug‘orish tizimi, geoma’lumotlarni boshqarish, tartibga solish va xavfsizlik sohalariga oid oltita muhim hujjat imzolandi.
Mazkur forum mintaqalararo hamkorlikni rivojlantirishda muhim qadam bo‘ldi. Manba: Zamin.uz
