O‘zbekiston va Yevropa Ittifoqi hamkorligi kengaymoqda
Prezident Shavkat Mirziyoyev 27-noyabr kuni O‘zbekistonga amaliy tashrif bilan kelgan Yevropa Ittifoqining Xalqaro sherikliklar bo‘yicha komissari Yozef Sikela va Kengayish masalalari bo‘yicha komissari Marta Kos boshchiligidagi delegatsiyani qabul qildi. Bu haqda Zamin.uz xabar berdi.
Uchrashuvda savdo-iqtisodiy va investitsiyaviy hamkorlikni rivojlantirish masalalari muhokama qilindi. Xususan, joriy yil oktyabr oyida Bryusselga amalga oshirilgan oliy darajadagi tashrif davomida erishilgan kelishuvlarni amalga oshirish muhimligi ta’kidlandi.
O‘zbekiston va Yevropa Ittifoqi o‘rtasidagi munosabatlar jadal rivojlanib borayotgani, ikki tomonlama hamkorlikning yangi, keng qamrovli kun tartibi shakllangani mamnuniyat bilan qayd etildi. Joriy yilda Kengaytirilgan sheriklik va hamkorlik to‘g‘risidagi bitim (KSHHB) imzolandi, Samarqand va Bryusselda muhim sammitlar o‘tkazildi hamda O‘zbekistonning Jahon savdo tashkilotiga a’zo bo‘lishi yuzasidan muzokaralar yakunlandi.
Yil boshidan buyon O‘zbekiston va Yevropa Ittifoqi o‘rtasidagi tovar ayirboshlash hajmi qariyb 7 foizga oshdi. KSHHBning amaliyotga joriy etilishi savdo hajmini oshirish va investitsiyalar oqimini ko‘paytirishga xizmat qilishi ta’kidlandi.
Shuningdek, savdoni kengaytirish va diversifikatsiya qilish, sanoat kooperatsiyasi, transport, raqamlashtirish, muhim minerallar, energetika, sog‘liqni saqlash kabi sohalarda yangi qo‘shma loyihalarni ishlab chiqish zarurligi qayd etildi. Uchrashuv davomida xalqaro va mintaqaviy kun tartibidagi dolzarb masalalar yuzasidan fikr almashildi.
Bu kabi uchrashuvlar O‘zbekiston va Yevropa Ittifoqi o‘rtasidagi strategik hamkorlikni yanada mustahkamlashga xizmat qilishi kutilmoqda.
