O‘zbekiston elchisi Avstraliya general-gubernatoriga ishonch yorlig‘i topshirdi
O‘zbekistonning Avstraliyadagi elchisi Alisher Qayumov yaqinda ushbu mamlakat general-gubernatori Samanta Mostinga ishonch yorlig‘ini topshirdi. Bu haqda Zamin.uz xabar berdi.
Bu haqda “Dunyo” axborot agentligi xabar berdi. Uchrashuv davomida general-gubernator Samanta Mostin O‘zbekistonda amalga oshirilayotgan islohotlarni yuqori baholab, mamlakatning rivojlanish yo‘lidagi yutuqlarini e’tirof etdi.
Shuningdek, Toshkent va Kanberra o‘rtasidagi hamkorlik istiqbollari muhokama qilindi. Uchrashuvda tomonlar ikki davlat o‘rtasidagi iqtisodiy hamkorlik, xususan, paxta va tog‘-kon sanoati sohalarida birgalikda ishlash imkoniyatlarini alohida ta’kidlashdi.
Samanta Mostin Samarqandda o‘tkazilgan YuNESKO konferensiyasining muvaffaqiyatli tashkil etilganini yuqori baholadi. Shuningdek, u O‘zbekistonning avstraliyalik sayyohlar uchun qiziqarli va jozibador yo‘nalishga aylanib borayotganini qayd etdi.
Ma’lumotlarga ko‘ra, Toshkent va Kanberra o‘rtasidagi diplomatik aloqalar 1991-yil dekabr oyida o‘rnatilgan. O‘sha paytda ikki davlat tashqi ishlar vazirlari maktublar almashgan edi.
Shuningdek, Alisher Qayumov joriy yil bahor oyidan beri Singapurda O‘zbekiston elchixonasiga ham boshchilik qilib kelmoqda. U Singapur prezidenti huzurida ishonch yorlig‘ini joriy yil aprel oyida topshirgan edi.
