O‘zbekiston Metrik Konvensiyaga qo‘shildi
O‘zbekiston xalqaro Metrik Konvensiyaga qo‘shildi. Bu haqda Zamin.uz xabar berdi.
Bu haqda Adliya vazirligi joriy yilning 27-noyabrida ma’lum qildi. Metrik Konvensiya dunyo davlatlari o‘rtasida metrologik standartlarning yagona bo‘lishini ta’minlashga qaratilgan hujjat hisoblanadi.
Dastlab ushbu konvensiya 1875-yilda Parij shahrida 17 ta davlat tomonidan imzolangan. Ushbu davlatlar orasida Argentina, Belgiya, Ispaniya, Rossiya va AQSh ham bor edi.
Mazkur konvensiyaga qo‘shilish davlatlarga o‘zaro kelishilgan va aniq o‘lchov me’yorlarini qo‘llash imkonini yaratadi. Bu esa xalqaro savdo, ilm-fan va texnologiya sohalarida muhim ahamiyat kasb etadi.
Shuningdek, ushbu konvensiya asosida Xalqaro o‘lchov va vaznlar byurosi hamda Xalqaro qo‘mita tashkil etilgan. Ushbu tashkilotlar metrologiyani muvofiqlashtirish va yangi o‘lchov tizimlarini ishlab chiqish bilan shug‘ullanadi.
O‘zbekistonning mazkur konvensiyaga qo‘shilishi mamlakatda metrologiya sohasini rivojlantirish va xalqaro hamkorlikni mustahkamlashga xizmat qiladi.
