Ko‘p qavatli uylar sifati qat’iy nazoratda bo‘ladi

O‘zbekistonda 2026-yildan boshlab ko‘p qavatli uylarning texnik holatini rasmiy ravishda tekshirish huquqiga ega bo‘lgan loyihalash tashkilotlari ro‘yxati joriy etiladi. Bu haqda Zamin.uz xabar berdi.

Ushbu ro‘yxat «Shaffof qurilish» tizimiga kiritiladi va sifat nazoratini amalga oshirishning muhim vositasi bo‘lib xizmat qiladi. Bu haqda prezident Shavkat Mirziyoyevning qarorida aytilgan.

Mazkur qarorga ko‘ra, endilikda respublikada tavsiyaviy xulosalar berish amaliyoti bekor qilinadi. Ko‘p qavatli uylarni foydalanishga qabul qilish faqat tegishli ijobiy xulosa bo‘lganda amalga oshiriladi.

Shuningdek, qaror qurilish tashkilotlarining zilzilabardoshlik talablariga qat’iy rioya etishini ta’minlashni nazarda tutadi. Bundan tashqari, noqonuniy qurilishlarni aniqlash va bartaraf etish bo‘yicha qat’iy mexanizmlar joriy qilinadi.

Ushbu chora-tadbirlar mamlakatda qurilish sifatini oshirish, xavfsizlikni ta’minlash hamda fuqarolar uchun qulay va xavfsiz yashash sharoitlarini yaratishga qaratilgan. Manba: one.uz.