Shavkat Mirziyoyev Jizzaxda AES qurilishini ko‘zdan kechirdi
O‘zbekiston Prezidenti Shavkat Mirziyoyev 2-dekabr kuni Jizzax viloyatiga tashrif buyurdi va u yerda atom elektr stansiyasi (AES) qurilish jarayonlarini ko‘zdan kechirdi. Bu haqda Zamin.uz xabar berdi.
Qurilish maydonida kichik quvvatga ega bo‘lgan ikkita reaktor va yirik ikki reaktor uchun kotlovan qazish ishlari olib borilmoqda. Qurilish bazasi tashkil etilgan bo‘lib, ishchilar uchun vaqtinchalik yashash shaharchasi barpo etilmoqda.
Shu bilan birga, AES uchun zaruriy materiallarni mamlakat ichida yetkazib berish va mutaxassislarni tayyorlash ishlari davom ettirilmoqda. Kelgusida AES xodimlari uchun 10 ming aholiga mo‘ljallangan alohida monoshahar qurilishi rejalashtirilgan.
Shuningdek, Prezident yangi yo‘l o‘tkazgich va to‘rt kilometrlik yo‘lni foydalanishga topshirdi. Yangi yo‘l tufayli Jizzaxga boradigan masofa 25 kilometrdan 4 kilometrga qisqardi.
Bu yo‘ldan kuniga 14 mingdan ortiq avtomobil harakatlanishi mumkin, bu esa transport oqimini sezilarli darajada yengillashtiradi. Zamonaviy texnologiyalar asosida qurilgan yo‘l o‘tkazgichning xizmat muddati 100 yil deb belgilangan.
U transport vositalarining poyezdlar harakati davomida ham to‘xtovsiz yurishini ta’minlaydi. Tashrif davomida Prezidentga shaharning yangilanish bo‘yicha loyihalari ham taqdim etildi.
Bu loyihalar doirasida eski turar joylarni rekonstruksiya qilish, yangi uylar qurish, IT-markaz va hunarmandchilik markazi tashkil etish, shuningdek, markaziy ko‘chalarni obodonlashtirish rejalari ko‘zda tutilgan.
