2025 yilda 6,4 mln o‘zbekistonlik xorijga safar qilgan
Milliy statistika qo‘mitasi ma’lumotlariga ko‘ra, 2025 yilning yanvar–oktabr oylarida qariyb 6,4 million nafar O‘zbekiston fuqarosi turistik maqsadlarda chet elga safar qilgan. Bu haqda Zamin.uz xabar berdi.
Ushbu ko‘rsatkich o‘tgan yilning xuddi shu davriga nisbatan 1,3 million nafarga yoki 24,7 foizga oshgan. Statistik ma’lumotlarga ko‘ra, 2025 yilning dastlabki 10 oyi davomida O‘zbekiston fuqarolari eng ko‘p tashrif buyurgan davlatlar ro‘yxati shakllantirilgan.
Unga ko‘ra, eng ko‘p borilgan davlatlar orasida birinchi o‘rinni Qirg‘iziston egallagan bo‘lib, bu davlatga 2,8 million nafar o‘zbekistonlik safar qilgan. Ikkinchi o‘rinda Qozog‘iston (1,2 million nafar), uchinchi o‘rinda esa Tojikiston (1,1 million nafar) joylashgan.
Shuningdek, Rossiyaga 370,1 ming, Saudiya Arabistoniga 237,1 ming, Turkiyaga 230,8 ming nafar fuqarolar safar qilgan. Birlashgan Arab Amirliklariga 114,1 ming, Misrga 56,2 ming, Xitoyga 39,6 ming va Vyetnamga 32,8 ming nafar o‘zbekistonlik borgan.
Qolgan davlatlarga esa jami 204,1 ming nafar fuqaro tashrif buyurgan. Mazkur ma’lumotlar turizmning rivojlanishi va fuqarolarning xorijiy davlatlarga bo‘lgan qiziqishi oshayotganidan dalolat beradi (manba: zamin.uz).
