O‘zbekistonga ta’lim uchun kelayotgan xorijliklar soni oshdi

Milliy statistika qo‘mitasi ma’lumotlariga ko‘ra, 2025-yilning yanvar–oktyabr oylarida O‘zbekistonga ta’lim olish maqsadida jami 33 287 nafar xorijlik fuqaro tashrif buyurgan. Bu haqda Zamin.uz xabar berdi.

Bu ko‘rsatkich o‘tgan yilning shu davriga nisbatan 11 307 nafarga yoki 51,5 foizga ko‘pdir. Ushbu ma’lumotlar O‘zbekistonning mintaqaviy ta’lim markazi sifatidagi nufuzi ortayotganini tasdiqlaydi.

Xorijlik talabalar oqimining asosiy qismi Hindiston va Turkmaniston kabi davlatlardan kelmoqda. Hindistondan 14 322 nafar, Turkmanistondan esa 8 348 nafar fuqaro ta’lim olish uchun O‘zbekistonga tashrif buyurgan.

Shuningdek, Tojikiston (2 323 nafar), Pokiston (1 620 nafar), Xitoy (1 254 nafar) va Janubiy Koreya (806 nafar) kabi davlatlardan ham talabalar kelgan. AQSH (429 nafar) va Buyuk Britaniya (153 nafar) kabi rivojlangan davlatlardan ham talabalar sonining ortib borayotgani O‘zbekiston ta’lim xizmatlarining xalqaro miqyosda tan olinayotganidan darak beradi.

Shuningdek, boshqa davlatlardan jami 1 431 nafar fuqaro ta’lim olish uchun O‘zbekistonga tashrif buyurgan. Bunday o‘sish mamlakatimiz ta’lim tizimining jozibadorligini oshirmoqda va O‘zbekistonni xalqaro ta’lim markaziga aylantirishga xizmat qilmoqda.

Ma’lumot manbasi: Milliy statistika qo‘mitasi.