Sirdaryoda 100 mln kub metrli suv ombori quriladi

Sirdaryo viloyatida sig‘imi 100 million kub metr bo‘lgan yangi suv ombori – "Sultonxovuz" qurilishi rejalashtirilmoqda. Bu haqda Zamin.uz xabar berdi.

Bu haqda davlat rahbari Shavkat Mirziyoyev viloyat Kengashi sessiyasida ma’lum qildi. Ushbu inshoot viloyatning beshta tumani qishloq xo‘jaligini suv bilan ta’minlab, yiliga ikki marta hosil olish imkoniyatini yaratadi.

Shuningdek, prezident 16 ming kilometr uzunlikdagi drenaj ariqlarini bosqichma-bosqich tozalash ishlarini boshlash bo‘yicha topshiriq berdi. Bundan tashqari, viloyatda tuproq sho‘rlanishini kamaytirishga qaratilgan tajriba loyihasini amalga oshirish rejalashtirilgan.

Ma’lum qilinishicha, O‘zbekistondagi suv omborlariga "aqlli" hisoblagichlar o‘rnatilishi belgilangan. Bu orqali suvdan foydalanish tizimini raqamlashtirish va sun’iy suv omborlaridagi suv hajmini onlayn kuzatib borish imkoniyati yaratiladi.

Mazkur chora-tadbirlar suv resurslaridan oqilona foydalanish va qishloq xo‘jaligini rivojlantirishga xizmat qiladi. Manba: one.uz