O‘zbekiston va Vengriya o‘rtasidagi strategik hamkorlik yangi bosqichga ko‘tarilmoqda. Bu haqda Zamin.uz xabar berdi.
Vengriya davlat boshqaruvi va hududiy rivojlanish vaziri Tibor Navrachich ishtirokida o‘tgan uchrashuvda muhim kelishuvlarga erishildi. Ularning asosiy qismi Sirdaryo viloyatining Xovos tumanida Vengriyaning «Smart qishloq» konsepsiyasini sinovdan o‘tkazish bilan bog‘liq.
Bu loyiha zamonaviy infratuzilma, raqamli xizmatlar va qulay biznes muhitini yaratishni ko‘zda tutadi. Uchrashuvda Sirdaryo viloyati hokimi Erkin Turdimov hamda Prezident huzuridagi Boshqaruv samaradorligi agentligi rahbari vazifasini bajaruvchi Ulug‘bek Husainov ishtirok etdi.
Tomonlar ikki davlat o‘rtasidagi do‘stlik va ishonchga asoslangan munosabatlar yangi bosqichga chiqayotganini ta’kidlashdi. Bu hamkorlik nafaqat siyosiy, balki iqtisodiy va innovatsion sohalarda ham kengaymoqda.
Muloqot davomida davlat boshqaruvida zamonaviy usullarni joriy etish, raqamlashtirish va ijro intizomini kuchaytirish kabi yo‘nalishlar muhokama qilindi. Xovos tumanida 50 gektar maydonda O‘zbekiston–Vengriya texnoparki tashkil etilishi, Budapesht shahrida tadbirkorlar ishtirokida biznes-forum o‘tkazilishi va Guliston davlat universitetida baliqchilik fakulteti ochilishi rejalashtirilmoqda.
Bundan tashqari, innovatsion boshqaruv yo‘nalishida bir qator qo‘shma dasturlar amalga oshiriladi. Uchrashuv yakunida Boshqaruv samaradorligi agentligi va Vengriya Davlat boshqaruvi va hududiy rivojlanish vazirligi o‘rtasida o‘zaro anglashuv memorandumi imzolandi.
Memorandum davlat fuqarolik xizmati, kadrlar tayyorlash, hududlarni barqaror rivojlantirish va innovatsion boshqaruv yechimlarini joriy qilishni o‘z ichiga oladi. Bu hamkorlik orqali Xovosda zamonaviy, texnologik va barqaror rivojlanish modelini yaratish rejalashtirilmoqda.
Ushbu tashabbuslar mamlakatlar o‘rtasidagi munosabatlarni yanada mustahkamlashga xizmat qiladi.
