O‘zbekiston Respublikasi Prezidenti Shavkat Mirziyoyev Qirg‘iziston Respublikasi Prezidenti Sadir Japarovni tug‘ilgan kuni bilan tabrikladi. Bu haqda Zamin.uz xabar berdi.
Tabrik telefon orqali amalga oshirildi. Suhbat davomida Shavkat Mirziyoyev Sadir Japarovga mustahkam sog‘lik, uzoq umr va farovonlik tiladi.
Ikki davlat rahbarlari o‘zaro hamkorlikni yuqori baholab, iqtisodiyot va madaniyat sohalarida aloqalarni yanada rivojlantirish niyatlarini bildirdilar. Qirg‘iziston Prezidenti o‘z navbatida, Shavkat Mirziyoyevga samimiy tabriklari va tilaklari uchun minnatdorlik izhor etdi.
U O‘zbekiston va Qirg‘iziston o‘rtasidagi do‘stona munosabatlar tobora mustahkamlanib borayotganini ta’kidladi. Suhbat chog‘ida ikki davlat uchun muhim bo‘lgan strategik loyihalar, jumladan, "Kambar-Ota-1" GESining qurilishi masalalari muhokama qilindi.
Mazkur loyiha ikki mamlakatning energetika sohasidagi hamkorligini mustahkamlashga xizmat qiladi. Shuningdek, bir kun oldin O‘zbekiston Prezidenti ushbu loyiha moliyalashtiruvi kelasi yil boshidan boshlanishini e’lon qilgani qayd etildi.
