Prezident korrupsiyaga qarshi kurash choralari belgiladi
Prezident Shavkat Mirziyoyev 10-dekabr kuni korrupsiyaga qarshi kurashish, qonun ustuvorligini ta’minlash va sohani raqamlashtirish bo‘yicha amalga oshirilayotgan ishlar bilan tanishdi. Bu haqda Zamin.uz xabar berdi.
Uchrashuvda korrupsiyaning mamlakat taraqqiyotiga salbiy ta’siri, uning oldini olish esa davlat siyosatining ustuvor yo‘nalishlaridan biri ekanligi ta’kidlandi. So‘nggi davrda davlat idoralarida ichki nazorat tizimi kuchaytirilib, o‘tkazilgan tekshiruvlar natijasida yirik moliyaviy xatolar aniqlangani qayd etildi.
Mablag‘larning noto‘g‘ri sarflanishiga chek qo‘yilgan, bu esa davlat resurslaridan samarali foydalanishga xizmat qilmoqda. Shuningdek, mansabdor shaxslarning javobgarlikka tortilishi masalasi ham muhokama qilindi.
Yig‘ilishda korrupsiyaning oldini olishda raqamlashtirishning ahamiyati alohida e’tirof etildi. Xususan, xavf-tahlil markazini tashkil etish, ma’lumotlar bazalarini yagona tizimga birlashtirish va davlat xaridlari jarayonida ochiqlikni oshirish bo‘yicha konkret rejalar belgilandi.
Shuningdek, korrupsiyaga qarshi kurashda jamoatchilik nazoratini kuchaytirish, profilaktika chora-tadbirlarini kengaytirish va iqtisodiy jinoyatlarning oldini olish bo‘yicha mutasaddilarga aniq topshiriqlar berildi. Bu chora-tadbirlar orqali sohada shaffoflikni ta’minlash va fuqarolarning davlat idoralariga bo‘lgan ishonchini oshirish maqsad qilingan.
