Yaqinda dunyo mamlakatlaridagi tabiiy boyliklarning aholi jon boshiga to‘g‘ri keladigan qiymati bo‘yicha reyting e’lon qilindi. Bu haqda Zamin.uz xabar berdi.
Unda Saudiya Arabistoni birinchi o‘rinni egalladi. Bu mamlakatda har bir fuqaro hisobiga taxminan 1 million dollarlik yerosti boyliklari to‘g‘ri keladi.
Ikkinchi va uchinchi o‘rinlarni Kanada va Avstraliya egallagan bo‘lib, u yerda bu ko‘rsatkich 700 ming dollardan oshadi. Kanadaning yuqori natijasi neft, o‘rmon va mineral resurslarga boyligi bilan, Avstraliya esa temir rudasi, ko‘mir va tabiiy gaz zaxiralari sababli yuqori o‘rinda turibdi.
To‘rtinchi o‘rinda Rossiya joylashgan, u yerda har bir fuqaro hisobiga 520 ming dollarlik tabiiy boyliklar to‘g‘ri keladi. O‘zbekiston bo‘yicha bu ko‘rsatkich qanday?
Rasmiy ma’lumotlarga ko‘ra, mamlakatimiz yerosti boyliklari katta salohiyatga ega. Geologiya va mineral resurslar bo‘yicha davlat qo‘mitasi ma’lumotlariga ko‘ra, 2018-yilda O‘zbekistonning mineral-xomashyo resurslari qiymati 5,7 trillion dollarga baholangan edi.
Shundan 1 trillion dollari qidirib topilgan konlarga to‘g‘ri keladi. Ammo mamlakat hududining bor-yo‘g‘i 20 foizi to‘liq o‘rganilgan, bu esa yangi konlarni kashf etish imkoniyatlari hali katta ekanini ko‘rsatadi.
2023-yil dekabr oyida Tog‘-kon sanoati va geologiya vazirligi vakili Ilyos Jumayev O‘zbekistonda 101 ta oltin va 3 ta kumush koni mavjudligini ma’lum qildi. Shuningdek, mamlakatimizda mis, uran, neft, tabiiy gaz, litiy, volfram kabi ko‘plab strategik ahamiyatga ega minerallar bor.
Ayniqsa, oltin konlari Navoiy va Olmaliq kon-metallurgiya kombinatlarining xomashyo bazasini tashkil qiladi. Mis konlari esa asosan Toshkent viloyatida joylashgan.
2025-yilda o‘tkazilgan Toshkent xalqaro investitsiya forumida prezident Shavkat Mirziyoyev O‘zbekiston yerosti boyliklarining umumiy qiymatini 3 trillion dollarga baholadi. Davlat rahbari texnologik minerallarga bo‘lgan talab oshib borayotganini va O‘zbekistonning yuqori qo‘shilgan qiymatli mahsulotlar ishlab chiqarish markaziga aylanishi uchun barcha imkoniyatlar mavjudligini ta’kidladi.
Hozirgi aholi soni 38 milliondan oshganini inobatga olsak, har bir o‘zbekistonlikka taxminan 78–79 ming dollarlik tabiiy resurslar to‘g‘ri keladi. Bu ko‘rsatkich Saudiya Arabistoni yoki Kanada bilan taqqoslaganda pastroq bo‘lsa-da, mamlakatimizda hali to‘liq o‘rganilmagan zaxiralar ulkan ekani sabab kelgusida bu qiymat oshishi mumkin.
Manba: one.uz
