O‘zbekistonda yapon modeli asosida maxsus iqtisodiy zona (SEZ) tashkil etilishi rejalashtirilmoqda. Bu haqda Zamin.uz xabar berdi.
Ushbu tashabbus Yaponiya xalqaro hamkorlik agentligi (JICA) tomonidan ilgari surilib, yapon modeli va standartlariga asoslanadi. Bu masala davlat rahbari Shavkat Mirziyoyev va Yaponiyaning biznes vakillari o‘rtasidagi uchrashuvda muhokama qilindi.
Prezident Shavkat Mirziyoyev Yaponiya tadbirkorlarini O‘zbekiston iqtisodiyotini modernizatsiya qilish, sanoatlashtirish va eksport salohiyatini oshirish jarayonlarida faol ishtirok etishga taklif qildi. Uchrashuv davomida ikki davlat kompaniyalari o‘rtasidagi hamkorlikning asosiy yo‘nalishlari belgilab olindi.
Energetika barqarorligini ta’minlash va “yashil” energetikaga o‘tish masalalari muhim yo‘nalishlardan biri sifatida qayd etildi. Shuningdek, strategik ahamiyatga ega bo‘lgan foydali qazilmalarni chuqur qayta ishlash masalalariga e’tibor qaratildi.
Toshkent va Tokio o‘rtasida mashinasozlik, sanoat uskunalari ishlab chiqarish hamda yuqori texnologiyali iqtisodiyotni rivojlantirish kabi sohalar istiqbolli yo‘nalishlar sifatida belgilandi. Davlat rahbari Toshkentning Tokio bilan nafaqat investor sifatida, balki kelajak sanoatini yaratishda strategik hamkor sifatida ishlashga tayyorligini ta’kidladi.
O‘z navbatida, Yaponiya biznes vakillari O‘zbekistonda o‘z faoliyatlarini kengaytirish niyatlarini bildirishdi va qo‘shma loyihalarni amalga oshirish bo‘yicha rejalari haqida so‘z yuritishdi. Manba: One.uz
